షోలే. మన దేశంలో అసలు సిసలైన బ్లాక్ బస్టర్ సినిమా. కమర్షియల్ సినిమా సక్సెస్ కు నిలువెత్తు ఉదాహరణ. కలెక్షన్లలో, ప్రశంసల్లో దీనికి సాటి మరొకటి లేదు. హిందీ భాష రానివారు కూడా చాలా మంది షోలే సినిమా చూశారు. గబ్బర్ సింగ్ డైలాగులు అప్పట్లో చాలా పాపులర్. కథ, కథనం, సంగీతం, నటన, డైలాగులు, ఫొటోగ్రఫీ, అన్నీ పక్కాగా కుదిరిన పర్ ఫెక్ట్ సినిమా. అందుకే ఇది మూవీ ఆఫ్ ది మిలీనియం అని బీబీసీ సర్టిఫై చేసింది.
సరిగ్గా 40 ఏళ్ల క్రితం…. 1975 స్వాతంత్ర్య దినోత్సవం నాడు షోలే విడుదలైంది. చరిత్ర సృష్టించింది. అమితాబ్ బచ్చన్ ను సూపర్ స్టార్ ను చేసింది. ధర్మేంద్ర, హేమమాలిని లను ప్రేమికులుగా మార్చింది. నిర్మాతలకు భారీ లాభాలను తెచ్చిపెట్టింది.
అప్పట్లో 3 కోట్లతో తీసిన షోలే, 15 కోట్లు వసూలు చేసింది. ఇక ఈ 40 ఏళ్లలో వసూలు చేసిన కలెక్షన్లు, శాటిలైట్ రైట్స్ వగైరాలను కలుపుకొంటే రెవిన్యూ విషయంలో ఆల్ టైం హిట్ షోలేనే అంటారు సినీ పండితులు.
మన దేశంలో తొలి 70 ఎం ఎం సినిమా షోలే
ముంబైలోని మినర్వా థియేటర్లో ఐదేళ్లకు పైగా నిరాటంకంగా ఆడిన సినిమా షోలే.
దేశంలోని 100 థియేటర్లలో 25 వారాలు ఆడిన మొదటి బ్లాక్ బస్టర్ మూవీ షోలే.
హైదరాబాద్ లో ఎన్టీరామారావు నిర్మించిన రామకృష్ణ 70 ఎం ఎం లో షోలే దాదాపు రెండేళ్లు ఆడింది.
హిందీ రాని వారు కూడా ఈ సినిమాను చూశారు. షోలేతోనే హిందీ సినిమాలకు దక్షిణ భారతంలో డిమాండ్ పెరిగింది.
పక్కా కథ, స్క్రీన్ ప్లే ఈ సినిమాకు ప్రధాన బలం. వీటిని రాసిన వారు సలీం, జావేద్. సలీం మరెవరో కాదు, నటుడు సల్మాన్ ఖాన్ తండ్రి.
ఒక్కసారి కొత్తగా ఊహించుకోండి. జై (అమితాబ్) పాత్రలో శత్రుఘ్న సిన్హా. ఠాకూర్ పాత్రలో ధర్మేంద్ర. గబ్బర్ సింగ్ పాత్రలో డేనీ. అదేంటి అంటారా? ముందు అనుకున్న ప్రకారం ఇలాగే సినిమా రావాల్సింది. కానీ మార్పులు జరిగాయి. జంజీర్ లో నటించిన అమితాబ్ అయితేనే జై పాత్రకు కరెక్ట్ అనుకున్నారు దర్శక నిర్మాతలు. అందుకే శత్రుఘ్న సిన్హా వద్దనుకున్నారు.
ఠాకూర్ పాత్రను పోషించాలని ధర్మేంద్ర ముందు అనుకున్నాడు. కానీ వీరూ పాత్రకు జోడీగా హేమ మాలిని నటిస్తుందని తెలియగానే ఆ పాత్రకు షిఫ్ట్ అయ్యాడు.
డేనీకి డేట్స్ అడ్జస్ట్ కాకపోవడంతో గబ్బర్ సింగ్ పాత్ర అంజద్ ఖాన్ కు దక్కింది.
కిత్నే ఆద్మీ థే అంటూ గబ్బర్ సింగ్ ఎంట్రీ ఇచ్చే సీన్ ఒకే చెయ్యడానికి 40 టేకులు అవసరం అయ్యాయి.
యే దోస్తీ పాట షూటింగ్ కు 21 రోజులు పట్టింది.
బంగళాలోని దీపాలన్నింటినీ జయ భాదురి ఆర్పే సీన్ షూటింగ్ కు 20 రోజులు పట్టింది.
బెంగళూరుకు 50 కిలోమీటర్ల దూరంలోని రామనగర వద్ద గుట్టల నడుమ ఓ ఊరి సెట్టింగ్ వేసి రెండున్నర సంవత్సరాలు షూటింగ్ జరిపారు. సినిమాలో దాని పేరు రాంగఢ్. ఇప్పుడు అది ప్రముఖ పర్యాటక కేంద్రం.
ఈ సినిమా షూటింగ్ మొదలు కావడానికి 4 నెలల ముందు అమితాబ్, జయభాదురి పెళ్లి చేసుకున్నారు. అలా, కొత్త పెళ్లి కూతురు జయ ఈ సినిమాలో వితంతువుగా నటించింది.
ఈ సినిమాతోనే ధర్మేంద్ర, హేమమాలిని ప్రేమాయణం మొదలైంది. ఐదేళ్ల తర్వాత వారు పెళ్లి చేసుకున్నారు.
షోలే మూవీ ఆఫ్ ది మిలీనియం అని బీబీసీ 1999లో ప్రకటించింది.
బ్రిటిష్ ఫిలిం ఇనిస్టిట్యూట్ నిర్వహించిన ఓ ఒపీనియన్ పోల్ లో షోలేనే ఆల్ టైమ్ గ్రేట్ హిట్ అని అత్యధికులు ఓటు వేశారు.
2014లో వచ్చిన షోలే 3డి వెర్షన్ కు కూడా మంచి ఆదరణ లభించింది.
