‘ఓజీ’ ఇచ్చిన జోష్ తోనే సుజిత్ కొత్త సినిమా మొద‌లెట్టేశాడు. నానితో ఓ సినిమా ద‌స‌రా సంద‌ర్భంగా లాంఛ‌నంగా మొద‌లైంది. వెంక‌టేష్ పూజా కార్య‌క్ర‌మాల్లో పాల్లొన్నారు. వెంక‌ట్ బోయిన‌ప‌ల్లి నిర్మాత‌. ఇదో డార్క్‌ క్రైమ్ కామెడీ నేప‌థ్యంలో సాగే క‌థ అని తెలుస్తోంది. ‘ఓజీ’కి ముందే ఈ స్క్రిప్టు త‌యారు చేసుకొన్నాడు సుజిత్. ఇప్పుడు కొన్ని మెరుగులు దిద్దాలంతే.

ఈ సినిమాలో ఓ పాన్ ఇండియా స్టార్ న‌టించ‌బోతున్న‌ట్టు వార్త‌లు వ‌స్తున్నాయి. ఫృథ్వీరాజ్ సుకుమారన్ పేరు గ‌ట్టిగా వినిపించింది. మ‌హేష్ బాబు – రాజ‌మౌళి సినిమాలో ఫృథ్వీరాజ్ విల‌న్ గా న‌టిస్తున్న సంగతి తెలిసిందే. అయితే ఆ సినిమాలో బిజీగా ఉండడం వ‌ల్ల కొత్త సినిమాలు ఒప్పుకోలేక‌పోతున్నాడు ఫృధ్వీరాజ్‌. అందుకే.. మ‌రో న‌టుడి కోసం అన్వేష‌ణ మొద‌లెట్టారు. ఈసారి బాలీవుడ్ నుంచి ఓ హీరోని దింపే అవ‌కాశాలు ఉన్నాయి. ‘ఓజీ’ కోసం ఇమ్రాన్ హ‌ష్మీని తీసుకొచ్చాడు సుజిత్. ఆ ప్లాన్ వ‌ర్క‌వుట్ అయ్యింది. ప‌వ‌న్ క‌ల్యాణ్‌కి ధీటుగా ఆ పాత్ర‌ని తీర్చిదిద్దాడు సుజిత్. ఇప్పుడు కూడా అలాంటి ప్ర‌య‌త్న‌మే చేసే అవ‌కాశాలు క‌నిపిస్తున్నాయి. నాని ప్ర‌స్తుతం ‘ప్యార‌డైజ్‌’తో బిజీగా ఉన్నాడు. ఆ సినిమా అయ్యాకే సుజిత్ సినిమా ప‌ట్టాలెక్కుతుంది. సుజిత్ స్క్రిప్టు ప‌నులు పూర్తి చేసి, మిగిలిన తారాగ‌ణాన్ని ఎంచుకోవ‌డానికి కావాల్సినంత స‌మ‌యం దొరికిన‌ట్టే.