త్రివిక్రమ్ ని అంతా మాట‌ల మాంత్రికుడు అని పిలుచుకుంటారు ముద్దుగా. ఆ పేరుకి త‌న‌కంటే న్యాయం చేసేవాళ్లు ఎవ్వ‌రూ ఉండ‌రు. ప్ర‌తీ సీన్‌లోనూ.. ఓ ఛ‌మ‌క్కుమ‌నే డైలాగ్ ఉంటుంది. ఆ డైలాగులు ప‌ల‌క‌డానికైనా త్రివిక్రమ్ తో క‌ల‌సి ప‌నిచేద్దామ‌నుకుంటారు అంతా. త్రివిక్రమ్ రాస్తే.. ఆ డైలాగ్ కి తిరుగు ఉండ‌దు. అలాంటి త్రివిక్రమ్ డైలాగ్ ని పక్కన పెట్టి, హీరో ఓ కొత్త డైలాగ్ చెబితే. దాన్ని త్రివిక్రమ్ ఓకే చేస్తే…?
`అల వైకుంఠ‌పురం` సెట్లో అదే జ‌రిగింది. ఈ సినిమాలో బ‌న్నీ – హర్షవర్థన్ మ‌ధ్య ఓ సీన్ ఉంటుంది. `ఓ త‌రానికి మీరు ఇన్‌స్పిరేష‌న్‌` అని.. ఓ తిట్టుని పొగ‌డ్త‌లా.. చెబుతాడు బ‌న్నీ. ఆ డైలాగ్ బాగా క్లిక్క‌య్యింది. ఇప్పుడు చాలా చోట్ల మీమ్స్ రూపంలో ఆ డైలాగ్ క‌నిపిస్తోంది. నిజానికి ఈ డైలాగ్ స్క్రిప్టులో లేదు. అక్క‌డ `మీరు గ్రేట్ సార్‌..` అనే డైలాగ్ రాశాడు త్రివిక్రమ్. సెట్లో బ‌న్నీకి అప్ప‌టికప్పుడు త‌ట్టిన ఆలోచ‌న ఇది. త్రివిక‌మ్ కి చెబితే.. ఆయన న‌వ్వేసి.. `పెట్టేద్దాం` అన్నారు. అయితే కరక్షన్ చేసిన విష‌యం హ‌ర్ష వ‌ర్థ‌న్ కి చెప్ప‌లేదు. టేక్ లో బ‌న్నీ ఈ డైలాగ్ చెప్ప‌గానే.. హ‌ర్ష ఓ షాకింగ్ రియాక్ష‌న్ ఇచ్చారు. దాన్ని అలానే ఉంచేశాడు త్రివిక్రమ్. అలా.. త్రివిక్రమ్ డైలాగ్ ని పక్కన పెట్టి, బ‌న్నీ ఓ కొత్త డైలాగ్ ప‌లికాడ‌న్న‌మాట. ఈ విష‌యాన్ని ఈమ‌ధ్యే హర్షవర్థన్.. సోష‌ల్ మీడియాలో పంచుకున్నారు. త్రివిక్రమ్ డైలాగ్ నే మార్చాడంటే… బ‌న్నీ మామూలోడు కాదు.
