ఇటీవలి పక్షం రోజులు చంద్రబాబు ప్రభుత్వానికి రాహుకాలమని తెలుగు దేశం యువ నేత ఒకరన్నారు. తమ వాళ్ల తప్పిదాలతో ముఖ్యమంత్రి చంద్రబాబు నాయుడు ఉక్కిరిబిక్కిరి కావలసి వచ్చింది. నందిగామ ఆస్పత్రిలో కలెక్టర్‌ను బెదిరించారనే ఆరోపణపై ప్రతిపక్ష నేత జగన్‌ను ఇరకాటంలో పెట్టామనుకుంటే అంతకు మించిన వరుస ఘటనలు ప్రభుత్వాన్ని ఇబ్బందిలో పెట్టాయి. ఆరెంజ్‌ బస్సు ప్రమాదంపై ఆర్టీఎ కమిషనర్‌ పట్ల దురుసుగా ప్రవర్తించిన ఎంపిఎల్‌ఎల ఉదంతం, దానిపై నిరసన తెల్పుతున్న వైసీపీ ఎంఎల్‌ఎ చెవిరెడ్డి భాస్కరరెడ్డిని అరెస్టు చేసి తీసుకుపోవడంలో పోలీసులు అత్యుత్సాహం రెండూ ప్రభుత్వాన్ని ఆత్మరక్షణలో పెట్టాయి. ఎంతగా అంటే అగ్రశ్రేణి పత్రికలో వీటిపై చంద్రబాబు ఆగ్రహించినట్టు కథనాలు వెలువరించి సరిపెట్టాలని ప్రయత్నించారు. ఇంతలోనే నారాయణ స్కూలులో పదో తరగతి ప్రశ్నాపత్రం లీకేజి ఉదంతం భగ్గుమన్నది. సకాలంలో స్పందించి ఖండించకపోగా నారాయణ మంత్రి హౌదాలో గాక ప్రైవేటు సంస్థ యజమానిగా మారిపోయి అరగంట సేపు ఏమీ జరగలేదని సర్దిచెప్పడానికి తంటాలు పడ్డారు.మరో విద్యా సంస్థల అధినేత మంత్రి పల్లెరఘునాథరెడ్డి ఆయనను బలపర్చారు.సంబంధిత శాఖా మంత్రి నారాయణ వియ్యంకుడు గంటా శ్రీనివాస్ రావు వుండనే వున్నారు. జరిగిన ఘటనపై వెంటనే విచారణకు సిద్దపడి నిజానిజాలు తేల్చేబదులు రాజకీయ రక్షణకే పాలకపక్షం పాకులాడింది. ఎదురుదాడి చేసింది. ఆఖరుకు అధికారిక ప్రకటన ఎప్పుడు ఎలా అనేది కూడా హఠాత్తుగా నిర్ణయించి ముక్తసరిగా ముగించేశానుకుంది. ఆ దశలో ప్రతిపక్షం మామూలుకంటే తీవ్రంగా స్పీకర్‌ కోడెల శివప్రసాదరావును చుట్టుముట్టాకే చర్చ మొదలైంది. ఆ చర్చలోనూ అనవసర విషయాలుఎలా వున్నా ప్రతిపక్ష నేత ప్రభుత్వ వ్యూహాలను బాగానే బహిర్గతం చేశారు. అంతేగాక తన స్కూలు చదువుపై నిరాధారమైన అపహాస్యం చేస్తున్న అధికార పక్షానికి గట్టి జవాబే ఇచ్చారు. అంతటితో ఆగక చంద్రబాబు ఇంగ్లీషుపైనా పిహెచ్‌డిపైన కూడావ్యాఖ్యలు చేశారు. విచారణ జరిపిస్తే సాక్షి తరపున పూర్తి సహకారం ఇస్తామన్నారు. ఇదంతా వదలిపెట్టి సాక్షి విలేకరి విజిల్‌ బ్రౌజరా లేక స్ట్రింగ్‌ ఆపరేషన్‌ చేశాడాతేల్చడంముఖ్యమైనట్టు చంద్రబాబు మాట్లాడ్డం విచిత్రంగా వుంది. గతంలోనూ పత్తిపాటి పుల్లారావుపై ఆరోపణలు వచ్చినపుడు ఆయనో జగనో ఎవరోఒకరే వుండాలని లేనిపోని సవాళ్లు చేసి చర్చను దారితప్పించారు. ప్రతిపక్షం లోపాలువున్నా ఈ దశమొత్తం ప్రభుత్వమే సమర్థనతో సతమతమైంది నిజం.
సర్కారు ఆత్మరక్షణ-ప్రతిపక్షం విజృంభణ
