కరోనా వచ్చింది.. ఇప్పుడు ఒమిక్రాన్ వచ్చింది..ఆదాయం పడిపోయింది. ఈ కారణంగా ఉద్యోగుల జీతాలు అంతకు మించి ఇవ్వలేం. ఇదీ ఉద్యోగుల ఆందోళనలకు సిద్ధమవుతున్న సమయంలో ప్రభుత్వం సూటిగా.. సుత్తి లేకుండా పంపిన సందేశం. సీఎస్ సమీర్ శర్మతో పాటు ఆర్థిక శాఖకు చెందిన ఉన్నతాధికారులతో ప్రెస్మీట్ ఏర్పాటు చేసి.. చెప్పాలనుకున్నది మూడు ముక్కల్లో చెప్పేశారు. కరోనా వల్ల ఆర్థిక పరిస్థితి దారుణంగా దెబ్బతిన్నదని.. ఖర్చులను ఆదాయాన్ని బ్యాలెన్స్ చేసుకోవాల్సిన పరిస్థితి ఉందన్నారు.
అందుకే అన్ని రకాలుగా ఆలోచించి న తర్వాతనే పీఆర్సీ ప్రకటించారు. మధ్యంతర భృతి కన్నా.. ఐఆర్ తక్కువగా ఇవ్వడంపై సీఎస్ భిన్నంగా స్పందించారు. ఐఆర్ జీతంలో భాగంగా చెప్పలేమన్నారు. అంత కంటే ఎక్కువ ఇవ్వాలన్న రూలేం లేదన్నారు. అయితే ఎన్ని బెనిఫిట్స్ కట్ చేసినా.. జీతం మాత్రం తగ్గబోదని సీఎస్ హామీ ఇచ్చారు. గ్రాస్ శాలరీ తగ్గకుండా చూస్తామన్నారు. ఆర్థిక శాఖ ముఖ్య కార్యదర్శి రావత్ కూడా ఇంచుమించు ఇదే చెప్పారు. ఓ కుటుంబంలో ఆదాయఖర్చులు ఎలా చూసుకుంటారో.. ప్రభుత్వం కూడా అలాగే చూసుకోవాల్సి ఉందని.. జీతభత్యాల ఖర్చులు పరిధి దాటిపోయాయన్నారు.
అందుకే పరిమితంగా ప్రయోజనాలు కల్పించాల్సి వచ్చిందన్నారు. గతంతో పోలిస్తే ఆదాయం పడిపోయిందన్నారు. కరోనా కష్టకాలంలోనూ రూ. పదిహేడు వేల కోట్ల ఐఆర్ ఇచ్చామన్నారు. మొత్తంగా ప్రభుత్వం స్పష్టమైన సంకేతాన్ని పంపింది.. ఎట్టి పరిస్థితుల్లోనూ హెచ్‌ఆర్‌ఏను మళ్లీ సాధారణ స్థితికి తేవడం కానీ.. ఫిట్మెంట్‌ను మార్చడం కానీ చేసేది లేదని తేల్చేసింది. ఇక ఏం చేయాలో ఉద్యోగుల చేతుల్లో ఉంది.
