తెలంగాణలో పట్టు సాధించడానికి అన్ని రకాల అనుకూల పరిస్థితులు ఉన్నాయని నమ్ముతున్న భారతీయ జనతా పార్టీ… ముందుగా హైదరాబాద్‌పై దృష్టి పెట్టింది. త్వరలో గ్రేటర్ హైదరాబాద్ కార్పొరేషన్ పాలకవర్గం పదవీ కాలం ముగియనుంది. వచ్చే జనవరిలో కార్పొరేటర్ ఎన్నికలు నిర్వహించాల్సి ఉంది. ప్రస్తుతం ఏ ఎన్నికలూ నిర్వహించే పరిస్థితి లేదు. కానీ.. ముందు ముందు పరిస్థితి మెరుగుపడుతుందని.. ఎన్నికలు జరుగుతాయని ఆశాభావంతో ఉన్న భారతీయ జనతా పార్టీ నేతలు.. ప్రత్యేకంగా హైదరాబాద్ టార్గెట్‌గా రాజకీయం ప్రారభించారు. కేంద్రమంత్రి కిషన్ రెడ్డి… కార్యక్షేత్రం హైదరాబాద్ కావడంతో.. ఆయన ఎన్నికలను మరింత సీరియస్‌గా తీసుకుంటున్నారు.
హైదరాబాద్‌లో పట్టు సాధిస్తే తెలంగాణలో ఇతర ప్రాంతాల్లో విస్తరించడానికి ఎక్కువ అవకాశం ఉంటుందని బీజేపీ ముఖ్యనేతలు అంచనాకు వచ్చారు. తెలంగాణ బీజేపీ అధ్యక్షుడిగా పగ్గాలు చేపట్టినప్పటి నుండి బండి సంజయ్ .. హైదరాబాద్‌పైనే ఎక్కువ దృష్టి పెట్టారు. జాతీయ ప్రధాన కార్యదర్శి మురళీధర్ రావు, మాజీ అధ్యక్షుడు లక్ష్మణ్ కలిసి గ్రేటర్‌లో పార్టీని బలోపేతం చేసేందుకు ప్రయత్నిస్తున్నారు. ఇతర పార్టీల నుంచి చేరికల్ని ప్రోత్సహించి కేడర్‌ను పెంచుకోవాలని నిర్మయించుకున్నారు. దీని కోసం.. మొత్తం గ్రేటర్‌ను నాలుగు భాగాలుగా విభజించుకుని నలుగురు బాధ్యత తీసుకున్నారు.
హైదరాబాద్ రాజకీయాల్లో ఆరెస్సెస్ తెర వెనుక పాత్ర కీలకంగా ఉంటుంది. భారతీయ జనతా పార్టీ ఎక్కడ బలపడినా.. దాని వెనుక బ్యాక్ గ్రౌండ్ మాత్రం.. ఖచ్చితంగా ఆరెస్సెస్ దే అయి ఉంటుంది. ప్రణాళికాబద్దంగా .. హైప్ లేకుండా… ప్రచారం చేయడం ఆరెస్సెస్ ప్రత్యేకత. అందుకే.. ఆరెస్సెస్ ముఖ్య నేతలతోనూ బీజేపీ నేతలు సంప్రదింపులు జరుపుతున్నారు. వారి అభీష్టం మేరకు.. గ్రేటర్‌లో పార్టీ పదవులు పంపకం చేయాలని కూడా నిర్ణయానికి వచ్చారు. వచ్చే అసెంబ్లీ ఎన్నికల నాటికి ప్రధాన శక్తిగా ఎదగాలని బీజేపీ ప్రయత్నిస్తోంది. గ్రేటర్‌లో వారు బలపడితేనే.. ఆ ప్రయత్నాల్లో ముందడుగు పడుతుంది.
