రియల్ ఎస్టేట్ రంగంలో కొనుగోలుదారులు అత్యంత ఎక్కువగా అయోమయానికి గురయ్యే అంశం ఈ వైశాల్యాల లెక్కలే. సరళంగా చెప్పాలంటే, కార్పెట్ ఏరియా అంటే మీరు ఇంట్లో కార్పెట్ పరుచుకోగలిగే నికర స్థలం. అంటే, నాలుగు గోడల లోపల మీకు లభించే అసలు ఖాళీ ప్రదేశం. దీనిలోనే మీరు నివసిస్తారు, ఫర్నిచర్ సర్దుకుంటారు. రేరా నిబంధనల ప్రకారం, బిల్డర్లు ఖచ్చితంగా కార్పెట్ ఏరియాను ప్రకటించాలి . దాని ప్రాతిపదికనే ధరను నిర్ణయించాలి.
కానీ, చాలా ప్రాజెక్టులలో మనకు సూపర్ బిల్డప్ ఏరియా గురించి చెప్తారు. ఇందులో కార్పెట్ ఏరియాతో పాటు గోడల మందం, బాల్కనీలు, వరాండా వంటి వ్యక్తిగత ప్రదేశాలే కాకుండా.. లిఫ్టులు, మెట్లు, కారిడార్లు, క్లబ్ హౌస్ , ఇతర కామన్ ఏరియాల వాటాను కూడా కలిపి లెక్కగడతారు. ఉదాహరణకు, మీరు 1500 చదరపు అడుగుల సూపర్ బిల్డప్ ఏరియా ఉన్న ఫ్లాట్ కొంటే, మీకు చేతికి వచ్చే కార్పెట్ ఏరియా కేవలం 1000 నుండి 1100 చదరపు అడుగులు మాత్రమే ఉండవచ్చు. ఈ రెండింటి మధ్య ఉన్న వ్యత్యాసాన్ని లోడింగ్ ఫ్యాక్టర్ అని పిలుస్తారు.
కొనుగోలుదారులు మోసపోకుండా ఉండాలంటే, బ్రోచర్ చూడగానే లోడింగ్ ఎంత ఉందో అడగాలి. సాధారణంగా ఇది 25 నుండి 35 శాతం వరకు ఉంటుంది. ఒకవేళ లోడింగ్ ఎక్కువగా ఉంటే, మీరు కామన్ ఏరియాల కోసం ఎక్కువ డబ్బు చెల్లిస్తున్నారని, మీకు వచ్చే నివాస స్థలం తక్కువని అర్థం చేసుకోవాలి. ఫ్లాట్ కొనేముందు ఫ్లోర్ ప్లాన్ జాగ్రత్తగా పరిశీలిస్తే, ప్రతి గది కొలతలు అడుగులలో ఉంటాయి. వాటిని కూడితే వచ్చేదే అసలు కార్పెట్ ఏరియా.
చివరగా, ధరను పోల్చి చూసేటప్పుడు కూడా జాగ్రత్త వహించాలి. ఒక బిల్డర్ చదరపు అడుగుకు రూ. 5,000 అని చెప్పి సూపర్ బిల్డప్ ఏరియాపై లెక్కించవచ్చు, మరొకరు రూ.7,000 అని చెప్పి కార్పెట్ ఏరియాపై లెక్కించవచ్చు. అటువంటప్పుడు, కేవలం రేటు తక్కువగా ఉందని మొదటి ఆప్షన్కు వెళ్లకూడదు. మొత్తం ధరను మీకు లభించే నికర కార్పెట్ ఏరియాతో భాగించి చూస్తే, మీరు ఒక చదరపు అడుగు నివాస స్థలానికి ఎంత చెల్లిస్తున్నారో స్పష్టమైన అవగాహన వస్తుంది.
