ఇటీవ‌ల స‌రైనోడులో లేడీ ఎమ్మెల్యేగా క‌నిపించింది కేథరిన్. ఆ పాత్ర‌కున్న ప్రాధాన్యం, అందులో కేథరిన్ చూపించిన విన్యాసం అంతంత మాత్ర‌మే. క‌నీసం లిప్ సింక్ క‌రెక్ట్‌గా ఇవ్వ‌డానికి కూడా మొహ‌మాట‌ప‌డిపోయింది కేథరిన్. ఆ సినిమా హిట్ట‌యినా కేథ‌రిన్‌ని ఎవ్వ‌రూ ప‌ట్టించుకొన్న పాపానికి పోలేదు. అయితే.. ఇప్పుడు కేథరిన్ పేరు మ‌రోసారి వార్త‌ల్లోకి వచ్చింది. ఈసారి ఏకంగా చిరంజీవి సినిమాలో స్పెష‌ల్ రోల్ చేసే అవ‌కాశం ద‌క్కింద‌ని చెప్పుకొంటున్నారు. చిరంజీవి 150వ చిత్రం క‌త్తిలాంటోడు ప్రీ ప్రొడ‌క్ష‌న్ ప‌నుల్లో ఉన్న సంగ‌తి తెలిసిందే. వ‌చ్చే నెల‌లో ఈ సినిమా సెట్స్‌పైకి వెళ్ల‌నుంది. ఇంకా ఈ చిత్రంలో హీరోయిన్ ఎవ‌రన్న‌ది ఫైన‌లైజ్ అవ్వ‌లేదు. అయితే.. ఓ పాత్ర‌కోసం కేథ‌రిన్‌ని తీసుకొన్నార‌న్న ప్ర‌చారం అయితే జోరుగా సాగుతోంది. కొన్ని కీల‌క సన్నివేశాల్లో న‌టించ‌డంతో పాటు చిరంజీవితో క‌ల‌సి ఓ పాట‌కు స్టెప్పులేయ‌బోతోంద‌ని టాక్‌.
అయితే కేథ‌రిన్‌కి అంత సీన్ ఉందా? వినాయ‌క్ ఏ న‌మ్మ‌కంతో కేథ‌రిన్‌ని ఎంచుకొంటాడ‌న్న ప్ర‌శ్న త‌లెత్తుతోంది. కేథ‌రిన్‌పై ఐరెన్ లెగ్ అనే ముద్ర ఉంది.. పైగా గొప్ప డాన్స‌రేం కాదు… న‌ట‌న కూడా అంతంత మాత్ర‌మే. అలాంట‌ప్పుడు చిరు సినిమాలో ఆమెకు ఛాన్స్ ద‌క్క‌డం అసాధ్యం అన్న‌ది చిరు కాంపౌండ్ వ‌ర్గాలు చెబుతున్నాయి. క‌త్తిలాంటోడులో ఓ స్పెష‌ల్ క్యారెక్ట‌ర్ ఉంది.. ఐటెమ్ సాంగూ ఉంది. అందుకోసం ఎవ‌రైతే బాగుంటారా అని చిత్ర‌బృందం అన్వేషిస్తోంది. ఆ క‌థానాయిక‌ల జాబితాలో రెజీనా పేరు ముందు వరుస‌లో ఉంది. కేథరిన్ పేరు కూడా చ‌ర్చకు వ‌చ్చుండొచ్చ‌ని టాక్‌.
