మనుషులని అవసరమున్నప్పుడు పూర్తిగా వాడేసుకొని అవసరం తీరిన తరువాత పులిహోరలో కరివేపాకులా తీసి పక్కన పడేయడం చంద్రబాబు నాయుడుకి అలవాటు అని రాజకీయ వర్గాలలో ఒక బలమయిన అభిప్రాయం ఉంది. సీనియర్ యన్టీఆర్, జూ.యన్టీఆర్, రోజా, ఆర్. కృష్ణయ్య వంటి వాళ్ళు ఎందరో ఆ లిస్టులో ఉన్నారు. వారిలో ఆర్. కృష్ణయ్య పరిస్థితి మరీ దయనీయంగా ఉంది. గత ఎన్నికలలో తెలంగాణాలో బీసీ ఓటు బ్యాంకుని కొల్లగొట్టడానికి ఎవరూ ఊహించని విధంగా బీసీ సంఘాల నేత ఆర్. కృష్ణయ్యని హడావుడిగా పార్టీలో చేర్చుకొని పార్టీలో సీనియర్లను కూడా కాదని ముఖ్యమంత్రి అభ్యర్ధిగా ప్రకటించారు. కానీ తెలంగాణాలో తమ పార్టీ అధికారంలోకి రాకపోవడంతో ఆయన ఎల్బీనగర్ నియోజక వర్గం నుండి ఎన్నికలలో గెలిచినా ఫలితం లేకపోయింది.
ఒకవేళ తెదేపా-బీజేపీ కూటమి ఎన్నికలలో గెలిచి తెలంగాణాలో అధికారంలోకి వచ్చి ఉండి ఉంటే అప్పుడు చంద్రబాబు నాయుడు నిజంగానే కృష్ణయ్యను ముఖ్యమంత్రిగా చేసేవారో లేదో తెలియదు కానీ ఎన్నికల తరువాత నుండి ఆయనని పట్టించుకోవడం మానేశారు. చంద్రబాబు నాయుడే పట్టించుకోకపోవడంతో పార్టీలో మిగిలినవారు కూడా ఆయనని పట్టించుకోవడం మానేశారు. చంద్రబాబు నాయుడుకి బీసీల మీద ఎటువంటి ప్రేమ ఉందో ఇది తెలియజేస్తోంది. అవసరం కోసం కృష్ణయ్యను చేరదీసిన చంద్రబాబు నాయుడు ఆ అవసరం తీరగానే పులిహోరలో కరివేపాకులాగ తీసి పక్కన పడేశారు. దానితో షాక్ తిన్న కృష్ణయ్య కూడా క్రమేపీ తెదేపాకు దూరం అయ్యారు. ఒకప్పుడు బీసీ సంఘాల నేతగా మంచి పేరు సంపాదించుకొన్న కృష్ణయ్య ఇప్పుడు రాజకీయ అనామకుడుగా మిగిలిపోయారు.
అయితే అందుకు చంద్రబాబు నాయుడే కారణమని నిందించడానికి కూడా లేదు. బీసీ సంఘాల నేతగా మంచి పోరాట స్ఫూర్తి ప్రదర్శించిన కృష్ణయ్య రాజకీయాలలోకి వచ్చిన తరువాత అదే పోరాట స్పూర్తిని చూపలేకపోయారు. బహుశః పార్టీలో సీనియర్లు ఆయన పైకి రాకుండా అణచివేశారేమో తెలియదు. కానీ కారణాలు ఏవయినా ఆయన పార్టీలో తన ఉనికిని చాటుకోవడంలో విఫలమయ్యారు. ఒకవేళ ఆయనే గనుక తన ఉనికిని చాటుకొనగలిగి ఉండి ఉంటే లేదా రాష్ట్రంలో బీసీలను తెదేపా వైపు తీసుకు రాగలిగి ఉండి ఉంటే, చంద్రబాబు నాయుడు ఆయనను తప్పకుండా ఆధారించి ఉండేవారేమో? కానీ ఆయన దృష్టిని ఆకట్టుకోవడంలో విఫలం అవడంతో కృష్ణయ్య తెదేపా పులిహోరలో కరివేపాకయిపోయారు. ఆ కారణంగా ఆయన తన బీసీ సంఘాల దృష్టిలో కూడా చులకన అయ్యారు.
కానీ బీసీల పట్ల తనకు ఎంతో ప్రేమ ఉందని చెప్పే చంద్రబాబు నాయుడు కృష్ణయ్య పట్ల ఆవిధంగా వ్యవహరించకుండా ఉండి ఉంటే, బీసీ వర్గాలకు చంద్రబాబు నాయుడు పట్ల ఎంతో గౌరవం, నమ్మకం ఏర్పడి ఉండేవి. వచ్చే ఎన్నికల నాటికి దాని వలన తేదేపాకు చాలా మేలు జరిగి ఉండేది. కానీ చంద్రబాబు నాయుడు అలవాటులో పొరపాటుగా క్రిష్ణయ్యను తీసి పక్కన పడేశారు.
