ఎస్.ఎస్. తమన్.. గురించి ప్ర‌త్యేకంగా చెప్పాల్సింది ఏముంది?? అయితే తమన్ పేరుకి చిరంజీవి ఓ స‌రికొత్త నిర్వ‌చ‌నం ఇచ్చాడు. ఎస్ అంటే సిగ్గు.. ఎస్… అంటే సూప‌ర్ హిట్టూ అని. అల్లు శిరీష్ క‌థానాయ‌కుడిగా న‌టించిన శ్రీరస్తు – శుభ‌మ‌స్తు ప్రీ రిలీజ్ ఫంక్ష‌న్‌కి చిరంజీవి ముఖ్య అతిథిగా విచ్చేశాడు. ఈ సంద‌ర్భంగా చిరు మాట్లాడుతూ తమన్ సంగీతం గురించి ప్ర‌స్తావించాడు. ఓవైపు మెచ్చుకొంటూనే మ‌రోవైపు చుర‌క‌లు అంటించాడు. తమన్ పాట‌లు ముందు విన్న‌ప్పుడు ఏం అర్థం కాలేద‌ని, సాహిత్యం న‌లిగిపోతోంద‌న్న భావన క‌లిగింద‌ని, అయితే తమన్ పాట‌లు విన‌డం ఓ వ్య‌స‌నంగా మార్చేశాడ‌ని, తమన్ వెళ్తున్న దారి క‌రెక్టేన‌ని అన్నాడు.
అంతేకాదు….. త‌న 151వ సినిమాకి మ్యూజిక్ డైరెక్టర్ త‌మ‌నే అని స్టేజీపై డిక్లేర్ చేశాడు. ”ట్యూన్లు బాగుంటే నువ్వే నా 151 వ సినిమాకి మ్యూజిక్ డైరెక్టర్. కావాలంటే ఇప్ప‌టి నుంచే ట్యూన్లు రెడీ చేసుకో” అని బంప‌ర్ ఆఫ‌ర్ ఇచ్చేశాడు చిరు. దాంతో… తమన్ షాకైపోయాడు. చిరు సినిమాలో ఆఫ‌ర్ అంటే మాట‌లా మ‌రి?? మొత్తానికి శ్రీరస్తు – శుభ‌మ‌స్తు ఫంక్ష‌న్ ద్వారా చిరుకి త‌న త‌దుప‌రి సినిమా కోసం మ్యూజిక్ డైరెక్ట‌ర్‌ని వెదుక్కొనే శ్ర‌మ త‌ప్పింది.
