క్రేజీ సినిమాల‌కు కేరాఫ్‌గా మారింది మైత్రీ మూవీస్‌. ఇప్పుడున్న స్టార్ హీరోలంద‌రితోనూ మైత్రీ సినిమాలు తీసింది. అయితే… అప్ప‌టి మూల‌స్థంభాలైన చిరంజీవి, నాగార్జున, వెంక‌టేష్‌, బాల‌కృష్ణ‌ల‌తో మైత్రీ ప‌నిచేయ‌లేదు. ఇప్పుడు ఆలోటు కూడా తీర్చుకోవాల‌ని చూస్తోంది మైత్రీ. ముందుగా వాళ్ల దృష్టి చిరంజీవిపైనే ప‌డింది. చిరుతో ఓ సినిమా చేయాల‌ని, లేదంటే.. రాబోయే సినిమాల్లో అయినా, ఓ పార్ట్ అవ్వాల‌ని మైత్రీ భావిస్తోంది.
ఇప్ప‌టికే మైత్రీ చాలా మంది ద‌ర్శ‌కుల‌కు అడ్వాన్సులు ఇచ్చింది. వాళ్ల‌తో చిరుకి స‌రిపోయే క‌థ గురించి చ‌ర్చ‌లు సాగిస్తున్న‌ట్టు తెలుస్తోంది. `రంగ‌స్థ‌లం` సినిమాతో మైత్రీ నిర్మాత‌లు చిరు కుటుంబానికి బాగా ద‌గ్గ‌రయ్యారు. ఆ స‌మ‌యంలోనే చిరు – మైత్రీల సినిమా ప్ర‌స్తావ‌న వ‌చ్చిన‌ట్టు తెలుస్తోంది. ఇప్పుడు దానిపైనే మైత్రీ కూడా క‌స‌ర‌త్తు చేస్తోంద‌ని స‌మాచారం. సుకుమార్ మైత్రీకి ఆస్థాన ద‌ర్శ‌కుడు అయిపోయాడు. త‌న‌కీ చిరంజీవితో ఓ సినిమా చేయాల‌ని కోరిక. అన్నీ అనుకున్న‌ట్టు జ‌రిగితే.. చిరు – సుకుమార్ – మైత్రీ… ఈ కాంబో చూడొచ్చు.
