రాజకీయాల్లోకి రావాలి, దేశానికి సేవ చేయాలి, భవిష్యత్ తరాలకైనా ఓ మంచి జీవితాన్ని ఇవ్వాలి అని ఆలోచించేవాళ్ళు చాలా మంది ఉన్నారు మన సమాజంలో. సినిమా ఇండస్ట్రీలో కూడా కొంతమంది అలాంటి వాళ్ళు ఉన్నారు. అలాగే రాజకీయాలకు స్పెల్లింగ్ కూడా తెలియని వాళ్ళూ ఉన్నారు. అలాంటి వాళ్ళలో మన సాంబడు అలీ కూడా ఒకరు. రాజకీయాల్లోకి ఎప్పుడు వస్తారు అని ఓ జర్నలిస్ట్ అడిగిన ప్రశ్నకు పరమ సిల్లీ ఆన్సర్ చెప్పాడు అలీ.
రాజకీయమంటే ఎన్నికల్లో పోటీచేయడం, ఎమ్మెల్యేనో, ఎంపినో అయిపోవడం అన్న గట్టి ఫీలింగ్ మనవాడికి ఉన్నట్టుంది. అందుకే…‘ఇది 2016 వ సంవత్సరమే కదా…2017 ఉంది, 2018 ఉంది, ఆ తర్వాత 2019లో చెప్తాడట. అది కూడా మీడియాతో కాకుండా ఒక భారీ బహిరంగ సభను ఏర్పాటు చేసి చెప్తాడట. వారెవ్వా….ఏం జెప్పినవ్ సామీ. ఆ బహిరంగ సభలో ‘నేను రాజకీయాల్లోకి వస్తున్నాను. ఇప్పుడున్నవాళ్ళందరూ వేస్టు…నేను బెస్టు…నాకు ఓటేసి గెలిపించండి, మీ జీవితాలను ధన్యం చేసుకోండి..’ అని మీరు పిలుపివ్వగానే పోలోమని పోలింగ్ బూతులకు వెళ్ళి ఓట్లు గుద్దెయ్యాలన్నమాట. రాజకీయాల్లోకి వచ్చే విషయం అప్పుడు చెప్తాను అని మీరు మాట్లాడుతున్నప్పుడు మీ కళ్ళలో వెలుగులు, నవ్వులు, ఆ కాన్ఫిడెన్స్ చూస్తుంటే నా సామి రంగా…… మీరు రాజకీయాల్లోకి రావడమే తెలుగు ఓటర్ల అదృష్టం అన్న గట్టి ఫీలింగ్తోనే ఉన్నట్టున్నారు.
అంతే కాదండోయ్….ప్రస్తుతం మాంచి ట్రెండింగ్లో ఉన్న పొలిటికల్ ఇష్యూ… ప్రత్యేక హోదా గురించి కూడా మాట్లాడేశారు అలీవారు. మాట్లాడడం కాదు ప్రత్యేక హోదా ఎలా తెచ్చుకోవాలో చెప్పేశారు. సున్నితంగా అడిగి తీసుకోవాలట…..ర్యాష్గా వెళ్ళకూడదట. ఇక్కడే శ్రీ అలీవారు తన రాజకీయం ఏంటో కూడా రుచి చూపించేశాడు. ఆ మాటలు ఆల్రెడీ ఎవరో చెప్పారట. అలీగారి అభిప్రాయం కూడా అదేనట. అలాగే ఈయనగారి జిగిరీ దోస్త్ పవన్ కళ్యాణ్గారి రాజకీయ ప్రవేశం గురించి కూడా మాట్లాడేశారు. ఇప్పుడొక మూడు సినిమాలు చేస్తున్నారట. అవి కంప్లీట్ అయ్యాక…ఎన్నికల సంవత్సరం వచ్చేసరికి ఆయన కూడా రాజకీయరణరంగంలోకి దూకేస్తారట. ఈ మాటలకు కూడా అనుకుంటున్నానన్న వర్డ్ని యాడ్ చేశాడు అలీ. రాజకీయం, ఎన్నికలంటే ఎంత ఎటకారమైపోయింది సాంబా……..?