ఆమ్ ఆద్మీ పార్టీ వారి లీలా విన్యాసాల పరంపర ఆగటం లేదు. ముఖ్యమంత్రి నుంచి మంత్రుల వరకూ బాధ్యతా రాహిత్యానికి బ్రాండ్ అంబాసిడర్లుగా మారిపోయారు. మంత్రి గోపాల్ రాయ్ మరీ అమానుషంగా ప్రవర్తించారనే విమర్శలు వెల్లువెత్తుతున్నాయి.
సదరు మంత్రిగారు శుక్రవారం ఛత్తీస్ గఢ్ వెళ్లారు. ఆయనకు సెక్యూరిటీగా పోలీసులు మరో వాహనంలో వెంట వెళ్లారు. కాంకేర్ లో మీడియాతో మాట్లాడిన తర్వాత రాయ్ భానుప్రతాప్ పూర్ వెళ్లారు. ఆయన కాన్వాయ్ లోని సెక్యూరిటీ వాహనం అదుపు తప్పి బోల్తా పడింది. ఒక పోలీస్ కానిస్టేబుల్ ప్రాణాలు కోల్పోయారు. మరో నలుగురు పోలీసులు గాయపడ్డారు. ఇది తెలిసి కూడా మంత్రి గారు అక్కడ ఆగలేదు. పోలీసుల గురించి పట్టించుకోలేదు. కూల్ గా ముందుకు వెళ్లిపోయారు. కాన్వాయ్ లోని ఇతర పోలీసులు క్షతగాత్రులను ఆస్పత్రిలో చేర్చారు. తన పర్యటన ముగిసిన తర్వాతైనా, ఆస్పత్రికి వెళ్లి ఆ పోలీసులను పరామర్శించాలనే ఆలోచనే మంత్రి గారికి రాలేదు. ఆయన తిన్నగా ఢిల్లీ వెళ్లిపోయాడు.
మంత్రి తీరుపై తీవ్ర విమర్శలు వెల్లువెత్తాయి. తనకు భద్రతగా వచ్చిన పోలీసుల పట్ల కూడా కనీస మానవత్వం చూపక పోవడం ఆమ్ ఆద్మీ మంత్రికే చెల్లిందని కాంగ్రెస్, బీజేపీ నేతలువిమర్శించారు. సోషల్ మీడియాలోనూ మంత్రి తీరుపై చాలా మంది మండిపడ్డారు. ఆప్ మంత్రులు అమానవీయంగా ప్రవర్తించడం ఇది మొదటి సారి కాదనే విమర్శలుకూడా ఉన్నాయి.
ఢిల్లీ ప్రజలు డెంగీ, చికన్ గున్యాతో బాధ పడుతున్నారు. వారం రోజులుగా పరిస్థితి భయానకంగా ఉంది. మరణాల సంఖ్య పెరుగుతోంది. ఢిల్లీ సర్కారు వారి ఆధ్వర్యంలోని పలు ఆస్పత్రుల్లో కనీసం వ్యాధి నిర్ధారణ పరీక్షలు చేసే సదుపాయం లేదు. రోగులకు సరిగ్గా వైద్యం అందటం లేదు. అయినా ముఖ్యమంత్రి అరవింద్ కేజ్రీవాల్ ఏడాది తర్వాత రాబోయే ఎన్నికల కోసం ప్రచారంలో మునిగిపోయారు. ఆ తర్వాత సర్జరీ కోసమంటూ బెంగళూరు వెళ్లిపోయారు.
ఉప ముఖ్యమంత్రి మనీష్ సిసోడియా ఫిన్లాండ్ విహార యాత్రలో ఉన్నారు. ఇక, గోవా టూర్లో ఉన్న వైద్య శాఖ మంత్రి ఢిల్లీ వచ్చినా, చిత్ర విచిత్రంగా మాట్లాడుతున్నారు. చికన్ గున్యా వల్ల మరణాలు సంభవించవని గూగుల్ చెప్తోందన్నారు. మరణాలకు కారణం డెంగీ అన్నారు. వ్యాధి ఏదైనా చికిత్స అందించాలి కదా అంటే బాధ్యతా రహితంగా జవాబిస్తున్నారు.
