సినీ రంగంలో మెగాస్టార్ గా ఎదిగి, రాజకీయాలలోకి వెళ్లి ఇబ్బందిపడుతున్న చిరంజీవి మళ్ళీ పోగొట్టుకొన్న చోటునే ఉంగరం వెతుకొనే ప్రయత్నంలో సినీ పరిశ్రమకి తిరిగి వచ్చేరు. ఆయన చేయబోయేది 150వ సినిమా కావడంతో దానిపై అభిమానులలో అంచనాలు పెరిగిపోయాయి. ఆ సినిమా గురించి ఆయన కూడా కొంచెం అతిగా అభిమానులను ఊరించడం చేత దానిపై వారిలో అంచనాలు ఇంకా పెరిగిపోయాయి. ఓ ఆర్నెల్లు ఓ దర్శకుడితో కధా చర్చాల పేరిట పట్లు పట్టినా ఫలితం లేకపోవడంతో, ఎప్పుడూ కొంచెం సేఫ్ గేమ్ ఆడేందుకు ఇష్టపడే చిరంజీవి తమిళ కత్తిని పట్టుకొన్నారు. అంటే తమిళంలో సూపర్ హిట్ అయిన కత్తి సినిమాని తెలుగులో రీమేక్ చేయడానికి సిద్దమయ్యారు. అందుకు అభిమానులు, రామ్ గోపాల్ వర్మ వంటి మెగాభిమానులు కూడా చాలా హర్ట్ అయ్యారు కూడా. ‘తెలుగులో కధలే దొరకలేదా..రీమేక్ తో రీఎంట్రీ ఇస్తున్నారు?’ అని చిరంజీవి విమర్శలు ఎదుర్కోవలసివచ్చింది.
అయినా ఆయన ఎత్తిన కత్తిని దించలేదు…అయినా ఆయనపై 150వ సినిమా ఒత్తిడి తగ్గలేదు. అభిమానుల అంచనాలను అందుకోలేకపోతాననే భయం వలనేనేమో, ఆ ‘150వ గండం’ గట్టెక్కేయాలని తన కొడుకు రామ్ చరణ్ తేజ్ చేసిన ‘బ్రూస్లీ’ సినిమాలో చిన్న అతిధి పాత్రలో నటించేసి ‘మమ’ అనిపించేసారు. కానీ ఆ బ్రూస్లీ కూడా చతికిలపడటంతో మళ్ళీ కధ మొదటికి వచ్చినట్లయింది. మళ్ళీ ఆయనపై ఒత్తిడి పెరిగిపోయింది. దానితో ఇక ఆ తమిళ కత్తినే గట్టిగా పట్టుకొని ముందుకు సాగిపోవడానికి ఫిక్స్ అయిపోయారు.
ఆ సినిమా షూటింగ్ కి ముహూర్తం కూడా ఖరారు అయినట్లు వార్తలు వస్తున్నాయి. కానీ ఈలోగానే దాసరి నారాయణ రావు కూడా మరో కత్తి పట్టుకొని వచ్చి సవాలు విసురుతున్నారు. “ఆ కత్తినాదే..దానిపై సర్వ హక్కులు నాకే ఉంటాయి..కనుక ఎవరూ నా అనుమతి లేకుండా నా కత్తిని వాడుకోకూడదు,” అని ఆ కత్తి అసలు యజమాని అంటే కత్తి సినిమా కధా రచయిత ఎన్. నరసింహ రావు కత్తి ఫైట్ చేస్తున్నారు. సినిమా కధా హక్కుల వేదికకి అధ్యక్షుడుగా ఉన్న దాసరి వద్దకి ఆ కత్తి పంచాయితీ రావడంతో, ఆయన “నీ కత్తికి నా కత్తి అడ్డం వేస్తాను” అని అభయ హస్తం ఇచ్చి, చిరంజీవితో కత్తి ఫైట్ కి సిద్దమయిపోయారు. “ముందు మా కత్తికి న్యాయం చేసిన తరువాతనే మీ కత్తి తిప్పుకోమని” సూచించారు. ఒకవేళ కాదని మొండిగా కత్తి తిప్పదలిస్తే దర్శకుల సంఘం (అందులో మెగా కత్తికి దర్శకత్వం వహించబోతున్న వివి.వినాయక్ కూడా ఉంటారు), సినీ కార్మికుల సంఘాలు సహాయ నిరాకరణ చేస్తాయని హెచ్చరించారు. అంటే దాసరి మెగాస్టార్ తో డైరెక్ట్ కత్తి ఫైట్ కి సిద్దం అయిపోయినట్లే భావించవచ్చును. మరి వారు మొదలుపెట్టబోతున్న ఈ కత్తి యుద్ధంలో ఎవరు గెలుస్తారో చూడాలి. ఎందుకంటే ఇద్దరికీ అందులో మంచి నైపుణ్యం, అనుభవం, వెనుక బలమయిన సైన్యాలు ఉన్నాయి కదా అందుకే!
