పవన్ కల్యాణ్‌ను సీఎం అభ్యర్థిగా ప్రకటించడానికి ఒక్క శాతం ఓటు బ్యాంక్ మాత్రమే ఉన్న బీజేపీ కూడా అంగీకరించడం లేదు. జనసేన నాయకులు పవన్ కల్యాణ్‌ను సీఎం అభ్యర్థిగా ప్రకటించాలని వరుసగా డిమాండ్ చేస్తున్నారు. పోతిన మహేష్ లాంటి నేతలు సీఎం అభ్యర్థిగా పవన్‌ను ప్రకటించాలని డిమాండ్ చేశారు. కానీ జీవీఎల్ నరసింహారావు గంటల్లోనే వారి గాలి తీసేశారు. ఇప్పుడల్లా అలాంటి ప్రకటన చేసే అవకాశం లేదని తేల్చారు. నడ్డా పర్యటనలో ఎలాంటి ప్రకటన ఉండదని జీవీఎల్ స్పష్టం చేశారు.
ముఖ్యమంత్రి అభ్యర్థిత్వం అనేది తమ స్థాయిలో తీసుకునే నిర్ణయం కాదని.. జాతీయ స్థాయిలో నేతలు చర్చించి నిర్ణయం తీసుకుంటారని ఆయన కవర్ చేస్తున్నారు. తిరుపతి ఉపఎన్నికల సమయంలో అలాంటి నిర్ణయమేదీ తీసుకోకుండానే ప్రకటించి.. ఎన్నికలయిన తరవాత యూటర్న్ తీసుకున్న విషయం జీవీఎల్‌కు గుర్తున్నట్లుగా లేదు. అయినా ఏపీకి సంబంధించినంత వరకు జనసేన మేజర్ పార్టీ. ఏ ఎన్నికలు జరిగినా అదే విషయం స్పష్టమవుతోంది. లోకల్ ఎలక్షన్స్‌లో జనసేనతో పొత్తు ఉన్నా.. బీజేపీ కనీస స్థానాలను గెల్చుకోలేకపోయింది.
కనీసం ఒక్క శాతం ఓట్లు కూడా బీజేపీకి లేవు. ఆ పార్టీలో పవన్ స్థాయిలో ప్రజాదరణ ఉన్న నాయకుడు లేరు. అయినప్పటికీ పవన్ ను వ్యూహాత్మకంగా నిర్వీర్యం చేస్తున్నారు. పవన్ కల్యాణ్ సీఎం అభ్యర్థిగా ఉండాలంటే తమను బతిమాలుకోవాలన్నట్లుగా పరిస్థితి ఉంది. ఈ తీరుపై జనసేన కార్యకర్తల్లో అసంతృప్తి ఉంది. కానీ బయటపడలేకపోతున్నారు.
