హైదరాబాద్‌లో రియల్ ఎస్టేట్ ముసుగులో జరుగుతున్న భూదందాలపై హైడ్రా అధికారులు మరోసారి గట్టి హెచ్చరికలు జారీ చేశారు. ముఖ్యంగా ప్రభుత్వ భూములు, చెరువులు, కుంటల శిఖం భూములను కొందరు కేటుగాళ్లు నకిలీ డాక్యుమెంట్లతో సామాన్యులకు విక్రయిస్తున్నట్లు గుర్తించారు. భూమి కొనేముందు అది నిషేధిత జాబితా లో ఉందో లేదో సరిచూసుకోవాలని అధికారులు సూచిస్తున్నారు.

నకిలీ డాక్యుమెంట్ల మాయాజాలం

రియల్ ఎస్టేట్ సంస్థలు నకిలీ పట్టాదారు పాస్‌బుక్కులు, తప్పుడు సర్వే నెంబర్లతో లేఅవుట్లు చేసి సామాన్య ప్రజలను నమ్మిస్తున్నాయి. గతేడాది గందరగోళంగా ఉన్న నిషేధిత భూముల జాబితాను ఆసరాగా చేసుకుని, సబ్‌రిజిస్ట్రార్ కార్యాలయాల్లో లోపాలను వాడుకుంటూ అక్రమ రిజిస్ట్రేషన్లు చేయిస్తున్నట్లు ఫిర్యాదులు అందుతున్నాయి. ముఖ్యంగా శేరిలింగంపల్లి, చందానగర్, పటాన్‌చెరు వంటి ఐటీ కారిడార్ పరిసరాల్లో ఈ తరహా మోసాలు ఎక్కువగా జరుగుతున్నట్లు హైడ్రా గుర్తించింది.

హైడ్రా కఠిన చర్యలు

తాజాగా ఖానామెట్ వంటి ప్రాంతాల్లో రూ. 1,200 కోట్ల విలువైన 8 ఎకరాల ప్రభుత్వ భూమిని హైడ్రా స్వాధీనం చేసుకుంది. నకిలీ క్లెయిమ్‌లతో ప్రభుత్వ భూములను ఆక్రమించే ప్రయత్నం చేస్తే ఎంతటి వారినైనా వదిలిపెట్టే ప్రసక్తే లేదని కమిషనర్ రంగనాథ్ స్పష్టం చేశారు. ఇప్పటికే అక్రమ నిర్మాణాలపై బుల్డోజర్లు నడుస్తుండటంతో, భూమి కొనుగోలుదారులు తమ జీవితకాల కష్టాన్ని కోల్పోకుండా ఉండాలంటే డాక్యుమెంట్లను క్షుణ్ణంగా పరిశీలించాలని సూచించారు.

కొనేముందు ఇవి గమనించండి

ప్లాట్లు లేదా విల్లాలు కొనేవారు సదరు భూమి ఫుల్ ట్యాంక్ లెవల్ పరిధిలో ఉందో లేదో ధృవీకరించుకోవాలి. అలాగే ధరణి పోర్టల్‌లో ఆ భూమి సెక్షన్ 22-A లో ఉందో లేదో చెక్ చేసుకోవాలి. కేవలం గ్రామ పంచాయతీ అనుమతులు చూసి కాకుండా, హెచ్‌ఎండీఏ లేదా డిటిసిపి లేఅవుట్ అనుమతులు ఉన్నాయో లేదో చూసుకోవడం ఉత్తమమని అధికారులు సూచిస్తున్నారు. లేనిపక్షంలో, అక్రమ భూములుగా తేలితే ప్రభుత్వం వాటిని ఎప్పుడైనా స్వాధీనం చేసుకునే అవకాశం ఉందని హెచ్చరించారు.