సైనికులపై పాకిస్తాన్ ఉగ్రవాదుల దాడులకు ప్రతీకారంగా భారత సైనిక కమాండోలు పాకిస్తాన్ భూభాగంలో మెరుపుదాడులు / సర్జికల్ ఎటాక్స్ చేసి వచ్చిన సంఘటన ఉద్వేగపూరితమైన ప్రచారంగా కొనసాగుతోంది. ఈ సంఘటన జరుగుతున్నప్పుడే పాకిస్థాన్ లో పశ్చిమ ప్రాంతం బెలూచిస్థాన్ వైపు ఇరాన్ కూడా భారీ ఫిరంగులను / మోర్టార్ షెల్స్ పేల్చింది. ఇది భారత్, ఇరాన్ దేశాలు కూడబలుక్కుని చైనా కు చేసిన హెచ్చరిక!
పాకిస్థాన్ కు మిత్రుడైన చైనా ఈ వ్యూహాత్మక సర్జికల్ దాడులకు నెగెటివ్ గా స్పందిస్తుందేమోనని ఇండియా సందేహించింది… అందుకని ఇరాన్ ను రంగంలోకి దింపింది.
పొరుగు దేశాలైన ఇరాన్ కూ పాకిస్థాన్ కూ పడదు… అయితే చైనా ప్రపంచశక్తిగా ఎదిగేందుకు, గల్ఫ్ ప్రాంతంలో తన పట్టు పెంచుకునేందుకు, అరేబియా సముద్రంపై గ్రిప్ సంపాదించి, పనిలోపనిగా ఇండియాకు చెక్ పెట్టేందుకు చైనా వ్యూహాత్తకంగా సిల్క్ రూట్ పేరిట, ఎకనమిక్ కారిడార్ పేరిట పాకిస్థాన్ లోని గ్వదర్ పోర్టుకు నిధులిచ్చింది…
అది పాకిస్థాన్ కు పడమరలో… అది ఎంతోకాలంగా పాకిస్థాన్ నుంచి స్వేచ్ఛ కోరుకుంటున్న కాశ్మీర్ వంటి సమస్యాత్మక ప్రాంతం…. ఆ బెలూచిస్థాన్ లో తన నేవీ బేస్ ఏర్పాటు చేసుకుని, పాకిస్థాన్ లో గట్టి స్ధావరంఏర్పాటు చేసుకోవడమే చైనా ఎత్తుగడ…
ఇది గమనించిన ఇరాన్, ఇండియా ఒక్కటయ్యాయి. ఇరాన్ లో చబహార్ పోర్టుకు ఇండియా నిధులిచ్చింది. అవసరమైతే ఇండియా అక్కడ అణు జలాంతర్గాములను మొహరించే చాన్స్ దొరికింది. ఈ మొత్తం ప్రక్రియకు అమెరికా మద్దతునిచ్చింది. ఇది చైనాకు షాక్. ఈ చబహార్ పోర్టు అత్యంత కీలకమైన హొర్ముజ్ జలసంధికి సమీపంలో ఉంది.
ఈ జలసంధి మొత్తం గల్ప్ దేశాలకు ఎంత కీలకమంటే… ఓసారి యురేనియం తయారీ కోసం ఇరాన్ ఆ జలసంధిని రెండు రోజులు మూసేసింది… దీంతో చైనా గిలగిలా కొట్టుకుంది… ఇక్కడి నుంచి చైనాకు రోజుకు అయిదు లక్షల ముడి చమురు బ్యారెళ్లు వెళ్తాయి… అదీ కారణం… అవన్నీ అరేబియా సముద్రం నుంచి చైనాకు చేరుకునేవరకు కొన్ని వేల కిలోమీటర్ల సముద్రజలాలు ఇండియా పరిధిలోకి వస్తాయి… అలాంటి కీలకమైన ప్రాంతం కావడంతో ఇరాన్ ఏం చేస్తుందనేది ఎప్పుడూ చైనా గమనిస్తూ ఉంటుంది… ఒకేసారి ఇరాన్ పాకిస్థాన్ వైపు షెల్స్ ప్రయోగించడం మొదలుపెట్టిందో అప్పుడే చైనాకు షాక్ తగిలింది….
పరిస్థితి విషమిస్తే, చైనా గనుక పాకిస్థాన్ కు మద్దతుగా రంగంలోకి దిగితే ఇరాన్ కూడా వెంటనే రంగంలోకి దిగుతుందనే విషయం దానికి అర్థమైంది…. అది అర్థం కావటానికే ఇరాన్ ఆ పనికి పూనుకుంది. అలాగే పాకిస్థాన్ సైన్యం దృష్టి మళ్లించడం అనేది మరో కారణం.
అంతేకాదు…. అమెరికా, ఇరాన్ తో కలిసి ఇండియా త్వరలోనే అరేబియా సముద్రజలాల్లో భారీ సైనిక విన్యాసాలనూ ప్రదర్శించబోతున్నది…. అది చైనాకు ఓ ముందస్తు హెచ్చరిక అవుతుంది….
అంతర్జాతీయ రాజకీయాలు ఇలాగే ఉంటాయి…. సర్జికల్ దాడులకు ముందు ఇండియా ఎన్ని జాగ్రత్తలు తీసుకుందో చెప్పడానికే ఇదంతా!