మా సినిమాకి ఇంత భారీ బ‌డ్జెట్ అయ్యిందోచ్ అంటూ నిర్మాత‌లు డ‌ప్పులు కొట్టుకోవ‌డం మామూలే. పావ‌లా పెడితే… పాతిక రూపాయ‌ల బిల్డ‌ప్పు ఇస్తారు. తీరా సినిమా చూస్తే… `ఈ సినిమాకి అంత ఖ‌ర్చు అయ్యిందా?` అనిపిస్తుంది. తమన్నా సినిమాకీ ఇప్పుడు అలాంటి క‌ల‌రింగులే ఇస్తున్నారు. తమన్నా క‌థానాయిక‌గా విజ‌య్ ఓ చిత్రాన్ని తెర‌కెక్కిస్తున్నారు. ప్ర‌భుదేవా కీల‌క పాత్ర పోషిస్తున్న ఈ చిత్రాన్ని తెలుగు, త‌మిళ, హిందీ భాష‌ల్లో ఒకేసారి తెర‌కెక్కిస్తున్నారు. ఈ సినిమాకి ‘అభినేత్రి’ అనే పేరు కూడా ఫిక్స్ చేశారు.
అయితే ఈ సినిమా రూ.70 కోట్ల బ‌డ్జెట్‌తో తెర‌కెక్కుతోంది.. అంటూ నిర్మాత‌లు అప్పుడే బిల్డ‌ప్పులు ఇవ్వ‌డం మొద‌లెట్టారు. తమన్నా స్టార్ హీరోయినే కావొచ్చు. కానీ సోలోగా చేస్తున్న తొలి సినిమా. ఆ అమ్మ‌డిపై రూ.70 కోట్ల తో సినిమా తీయ‌డం అన్న‌ది న‌మ్మ‌శ‌క్య‌మైన విష‌యం కాదు. పైగా ఇదో హార‌ర్ సినిమా. హార‌ర్ చిత్రాల‌న్నీ ఓ ఇంటి చుట్టూ న‌డిచే క‌థ‌లే. అభినేత్రి కూడా అంతే కావొచ్చు. విజువ‌ల్ ఎఫెక్ట్స్‌కి ఎంత ఖ‌ర్చు పెట్టినా రూ.70 కోట్లు అవ్వ‌డం అసాధ్యం. త‌మ‌న్నాని న‌మ్ముకొని ద‌ర్శ‌క నిర్మాత‌లు అంత ధైర్యం చేస్తార‌నుకోవ‌డం కూడా అవివేకం. ఓ సినిమా ప్ర‌మోష‌న్ కోసం ఇలాంటి స్టేట్‌మెంట్లు ఇవ్వ‌డం మామూలే. కానీ.. మ‌రీ ఇంత టూమ‌చ్‌గానే అని అప్పుడే కామెంట్లు వినిపించ‌డం మొద‌లైపోయాయి.
