ఓ సినిమా మొద‌లయ్యాక టీజ‌రో, ఫ‌స్ట్ లుక్కో రావాలంటే కనీసం రెండు నెల‌లైనా ప‌డుతుంది. మహేష్ బాబు – మురుగ‌దాస్‌ల కాంబో అయితే ఇందుకు మిన‌హాయింపే. వీళ్లు ఎంత టైమ్ అయినా తీసుకోవొచ్చు. మిగిలిన స్టార్లు య‌మా ఫాస్టుగా కాక‌పోయినా రీజ‌న‌బుల్‌గానే ఫ‌స్ట్‌లుక్‌లు విడుద‌ల చేస్తున్నారు. అయితే ఇప్పుడో సినిమా రిలీజ్ రోజునే టీజ‌ర్‌ని విడిచి పెట్టింది. అదే… `ప‌టేల్‌`. జ‌గ‌ప‌తిబాబు ప్ర‌ధాన పాత్ర‌ధారిగా న‌టిస్తున్న చిత్ర‌మిది. వారాహి సంస్థ తెర‌కెక్కిస్తోంది. ఈ రోజే ఈ సినిమా క్లాప్ కొట్టుకొంది. అంత‌లోనే నిమిషం నిడివి ఉన్న ఓ టీజ‌ర్‌ని వదిలారు. అందులో చాలా ర‌కాలైన షాట్సే క‌నిపించాయి. డైలాగులూ వినిపించాయి. జ‌గ్గూభాయ్ లుక్ అయితే అదిరిపోయింది. సినిమా కంటెంట్ ఎలా సాగ‌బోతోందో.. చూచాయిగా చెప్పేశారు టీజ‌ర్‌లో.
ఈరోజు మొద‌లైన సినిమాకి టీజర్ రావ‌డం ఆశ్చ‌ర్య‌క‌ర‌మైన సంగ‌తే. అంటే.. ఈసినిమా ఎప్పుడో మొద‌లైంద‌న్న‌మాట.. అనుకోవొద్దు. నిజంగానే ఈ సినిమా షూటింగ్ ఇంకా మొద‌లు కాలేదు. అయితే ట్రైల‌ర్ షూట్ మాత్రం జ‌రిగింది. వాటినే క‌ట్ చేసి టీజ‌ర్‌గా వ‌దిలార‌న్న‌మాట. ట్రైల్ షూటే ఇలా ఉంటే..సినిమా ఎలా ఉంటుందో మ‌రి. ఈ సినిమాతో వాసు ప‌రిమి ద‌ర్శ‌కుడిగా ప‌రిచ‌యం అవుతున్నాడు. త‌నో యాడ్ ఫిల్మ్ డైరెక్ట‌ర్‌. ముంబైలో మంచి పేరుంది. సినిమాని సైతం యాడ్‌గా తీసి వ‌దిలుతున్నాడ‌న్న‌మాట. ఈ ట్రైల్ షూట్‌లో జ‌గ్గూభాయ్ లుక్ చాలా బాగుంది. ద‌ర్శ‌కుడిలో విష‌యం ఉంద‌న్న సంగ‌తి ఈ టీజర్ చూస్తే అర్థ‌మైంది. ఫ‌ర్లేదు.. ఈ ప‌టేల్‌పై అంచ‌నాలు పెంచుకోవొచ్చు.
