ఢిల్లీ లిక్కర్ స్కామ్ విషయంలో కవిత తరపున వ్యవహారాలు, వ్యూహాలు అమలు చేస్తున్న వారి ఆలోచన కవితను మరింత ఇబ్బందుల్లోకి నెట్టేలా ఉందన్న అభిప్రాయం వినిపిస్తోంది. దర్యాప్తు సంస్థపై వరుసగా మీడియాలో వ్యతిరేక ప్రచారం చేస్తున్నారు. ఈడీ మీడియాకు లీకులు ఇచ్చి ప్రత్యర్థులు విమర్శించేలా చేస్తోందని ఆమె అంటున్నారు. అలా అనడమే కాదు.. ఆమె క్యాంప్ అధికారికంగా అసలు ఈడీ విచారణలో ఏమి జరిగిందో ఓ లీక్ విడుదల చేశారు.
ఇందులో విచిత్రమైన అంశాలున్నాయి. అసలు కవితను ఈడీ విచారణ జరపలేదని.. కవితే ఈడీ అధికారులను ప్రశ్నించిందన్నట్లుగా ఆ అఫీషియల్ లీక్ ఉంది. ‘నన్ను ఏ ప్రాతిపదికన విచారణకు పిలిచారు? నేను నిందితురాలినా? ఢిల్లీ ప్రభుత్వం క్యాబినెట్‌ ఆమోదంతో అధికారికంగా మద్యం విధానాన్ని మార్చుకుంటే దాంతో నాకేంటి సంబంధం? ఇలా రాజకీయ కోణంలో మీరు ఎంతమందిని విచారణకు పిలుస్తారు? గతంలో విపక్షంలో ఉన్న హిమంత బిశ్వశర్మ, నారాయణ్‌ రాణె, సుజనా చౌదరిలపై ఈడీ పెట్టిన కేసులు ఏమయ్యాయి? వారు బీజేపీలో చేరగానే విచారణ ఎందుకు ఆగిపోయింది? విచారణ పేరుతో పిలిచి గంటల తరబడి ఒంటరిగా గదిలో కూర్చోబెట్టి మానసికంగా ఒత్తిడి చేస్తే లొంగిపోతామనుకుంటున్నారా? అసలు రాజకీయనాయకులపై మీరు పెడుతున్న కేసులెన్ని? వాటిలో ఎన్నింటిని రుజువు చేయగలిగారు?’.. ఇలా కవిత ప్రశ్నల పరంపర సంధిస్తే ఈడీ అధికార్లనుంచి నీళ్లు నమిలారని చెప్పుకున్నారు. కానీ ఈడీ అంత అవకాశం ఇస్తుందని ఎవరూ అనుకోవడం లేదు.
ఈడీని ఇలా కవిత కడిగి పారేశారని ఓ వైపు ప్రచారం చేస్తూ.. మరో వైపు కవిత పేరుతో ఓ లేఖ విడుదల చేశారు.అందులో రాజకీయ పరమైన ఆరోపణలు ఉన్నాయి. అలాగే బీఆర్ఎస్ నేతలు .. దర్యాప్తు సంస్థపై ప్రెస్ మీట్లు పెట్టి మరీ విమర్శలు చేస్తున్నారు. అసలు దర్యాప్తు సంస్థను ఇలా టార్గెట్ చేయడం ఏ మాత్రం మంచిది కాదని.. ఇలాంటి అంశాలపై అవగాహన ఉన్న వారు చెబుతారు. కానీ కవిత విషయంలో ఈ రిస్క్ తీసుకుంటున్నారు. ఎందుకిలా చేస్తున్నారన్నది మాత్రం వారికే తెలియాలి.కానీ అంతిమంగా ఇలా చేయడం వల్ల జరగాల్సిన నష్టం కన్నా ఎక్కువే జరుగుతుందన్న ఆందోళన మాత్రం బీఆర్ఎస్ క్యాడర్‌లో కనిపిస్తోంది.
