తెలంగాణ సీఎం కేసీఆర్ గల్ఫ్ పర్యటనకు వెళ్లబోతున్నారు. తెలంగాణ బిడ్డలు తిరిగి రాష్ట్రానికి వచ్చేయాలని పిలుపునివ్వడానికి త్వరలోనే గల్ఫ్ దేశాలకు వెళ్లాలని కేసీఆర్ నిర్ణయించుకున్నారు. కుటుంబాలను పోషించుకోవడానికి గల్ఫ్ దేశాలకు వెళ్లిన వారు వివిధ పనులు చేసుకుంటూ ఇబ్బందులు పడుతున్నారని కేసీఆర్ భావిస్తున్నారు. తెలంగాణ రాష్ట్రంలోనే వారు చేసుకోవడానికి పనులున్నందున తిరిగి రావాలని కేసీఆర్ కోరుతున్నారు. ఉమ్మడి కరీంనగర్, నిజామాబాద్ తో పాటు తెలంగాణలోని పలు ప్రాంతాల నుంచి ప్రజలు కుటుంబాలను పోషించుకోవడానికి పనులు వెతుక్కుంటూ గల్ఫ్ దేశాలకు వెళ్లారు. అక్కడ దొరికిన పని చేసుకుంటూ జీవనం సాగిస్తున్నారు.
ఇంతా చేస్తే వారికి లభించే జీతం కూడా తక్కువే. పైగా వేధింపులకు గురవుతున్నారు. తెలంగాణ రాష్ట్రంలో పరిస్థితి గతంలో లాగా లేదని ఇక్కడే చేసుకోవడానికి చాలా పని ఉందని కేసీఆర్ చెబుతున్నారు. ముఖ్యంగా హైదరాబాద్ నగరంలో అనేక నిర్మాణాలు జరుగుతున్నాయి. ఇక్కడ పనికి మనుషులు దొరకక వేరే ప్రాంతాల నుంచి రప్పించాల్సిన పరిస్థితి ఏర్పడింది. తెలంగాణ బిడ్డలు పనికోసం వేరే చోటకి వెళ్తే, తెలంగాణలో పనికోసం వేరే ప్రాంతాల నుంచి వస్తున్నారు. ఈ పరిస్థితిలో మార్పు రావాలని కేసీఆర్ భావిస్తున్నారు. ముఖ్యంగా గల్ఫ్ దేశాలకు వెళ్లే వారిని తిరిగి రప్పించాలని ప్రభుత్వం భావిస్తున్నది. తిరిగి వచ్చే వారికి తగిన శిక్షణ ఇప్పించి… రియల్ ఎస్టేట్ వ్యాపారులతోనూ, బిల్డర్లతోనూ సంప్రదించి, నిర్మాణ రంగంలో పని కల్పించాలని ప్రభుత్వం నిర్ణయించింది.
ఇదే విషయాన్ని గల్ఫ్ లో ఉన్న తెలంగాణ బిడ్డలకు స్వయంగా చెప్పడానికి గల్ఫ్ వెళ్లాలని కేసీఆర్ నిర్ణయించారు. అయితే గల్ఫ్‌లో పరిస్థితులు బాగోలేక తిరిగి వచ్చే వారికి ఇక్కడ ఉపాధి దొరకడం కష్టం ఉంది. వచ్చిన వారందరికీ ఉపాధి కల్పించడం అంటే సాధ్యమయ్యే పని కాదు. మరి కేసీఆర్ వ్యూహమేంటో అన్నది ఎవరికీ అర్థం కావడం లేదు.
