అమెరికాలో పవన్‌కల్యాణ్‌ ‘అజ్ఞాతవాసి’ సినిమాని డిస్ట్రిబ్యూషన్‌ చేసిన ‘ఎల్‌ఏ తెలుగు’ సంస్థకు ఎన్టీఆర్‌ సినిమా డిస్ట్రిబ్యూషన్‌ హక్కులను ఇచ్చారు. యంగ్‌ టైగర్‌ ఎన్టీఆర్‌ హీరోగా త్రివిక్రమ్‌ దర్శకత్వంలో హారిక హాసిని సంస్థ నిర్మిస్తున్న సినిమా ‘అరవింద సమేత… వీరరాఘవ’. అమెరికాలో ఈ సినిమాను ‘ఎల్‌ఏ తెలుగు’ డిస్ట్రిబ్యూషన్‌ చేయనుంది. పంపిణీ రంగంలో ఈ సంస్థకు ‘అజ్ఞాతవాసి’ తొలి సినిమా. ఎప్పటికీ మర్చిపోవాలనుకొనే చేదు సినిమాగా కూడా మిగిలింది. సుమారు ఇరవై కోట్ల రూపాయలు పెట్టి ఓవర్‌సీస్‌ డిస్ట్రిబ్యూషన్‌ హక్కులు కొంటే అందులో సగం వచ్చాయి. ఆ నష్టాలను భర్తీ చేయడానికి ఎన్టీఆర్‌ ‘అరవింద సమేత…’ హక్కులను ఇచ్చారు. త్రివిక్రమ్‌ మాటల్లో చెప్పాలంటే… సర్దుబాటు చేసినట్టే. ‘అజ్ఞాతవాసి’ నష్టాలను భర్తీ చేయడానికి పవన్‌, నిర్మాత, తను కలిసి పాతిక కోట్ల వరకూ వెనక్కి ఇచ్చామని త్రివిక్రమ్‌ పేర్కొన్న సంగతి తెలిసిందే. కొందరి డబ్బులు, అమెరికా డిస్ట్రిబ్యూటర్‌కి మరో సినిమా హక్కులు అన్నమాట! పవన్‌, ఎన్టీఆర్‌ సినిమాలకు ‘హారిక హాసిని’ చినబాబు (ఎస్‌ రాధాకృష్ణ) నిర్మాత అన్న సంగతి తెలిసిందే.
‘అజ్ఞాతవాసి’ అమెరికా డిస్ట్రిబ్యూటర్‌ చేతికి ఎన్టీఆర్‌ సినిమా
