బాక్సాఫీసుని ప్రభావితం చేయగలిగే అతి కొద్దిమందిలో ఎన్టీఆర్ ఒకడు. తనకి సరిపడా కథ పడాలే గానీ… సూపర్ హిట్ కొట్టడగలడు. యావరేజ్ కథే అయినా తన స్టామినాతో… దాన్నిసూపర్ హిట్ చేయగలడు. స్టార్కి కావల్సిన అన్ని లక్షణాలూ పుణికి పుచ్చుకొన్న పరిపూర్ణ నటుడు. తన దగ్గర అన్నీ ఉన్నాయి. ఒక్క ప్లానింగ్ తప్ప. ఎన్టీఆర్ కెరీర్ ని ముందు నుంచీ… ఒక్కసారి పరిశీలించి చూస్తే ఎన్టీఆర్ ప్లానింగ్లో లోపాలు పుష్కలంగా కనిపిస్తాయి. ఫలానా దర్శకుడితో చేయాలి.. ఫలానా కథలు ట్రై చేయాలి.. అని ఎప్పుడూ అనుకోలేదు ఎన్టీఆర్. తన దగ్గరకు వచ్చిన సినిమాలు చేసుకొంటూ వెళ్లాడు. సూపర్ హిట్లు కొట్టాక కొత్తవాళ్లకు అవకాశం ఇచ్చాడు. ఫ్లాపుల్లో ఉన్నప్పుడు కెరీర్ కాపాడుకోవడానికి అప్పుడే హిట్ కొట్టిన వాళ్లని ఆశ్రయించాడు. కథల ఎంపికలో కూడా చాలా తప్పులు చేశాడు. లుక్ పరంగా కొన్నాళ్లు ఏమాత్రం శ్రద్ద చూపించలేదు. ఇదంతా… ఎన్టీఆర్ లోపాలే.
ఇప్పుడు వరుస హిట్లతో మళ్లీ రేసులోకి వచ్చాడు. ఎన్టీఆర్ తలచుకొంటే ఏం జరుగుతుందో బాక్సాఫీసు ఫలితాలే తేల్చి చెబుతున్నాయి. వరుసగా భారీ వసూళ్లు పిండేసే సినిమాల్నే చేస్తున్నాడు. కానీ ఇప్పటికీ తన దగ్గర ప్లానింగ్ లేదు. జనతా గ్యారేజ్ తరవాత ఏ సినిమా చేస్తావ్? అని అడిగితే ఎన్టీఆర్ సైతం తేల్చుకోలేకపోతున్నాడు. పోనీ.. తన దగ్గర ఆప్షన్లు ఏమైనా ఎక్కువగా ఉన్నాయా అంటే అదీ లేదు. మిగిలిన హీరోలు అలా కాదు. చేతిలో నాలుగైదు కథల్ని పెట్టుకొన్నారు. ఆ సమయంలో తమకు అనువైన కథల్ని పట్టాలెక్కిస్తున్నారు. కొత్త దర్శకులకు కర్చీఫ్లు వేస్తున్నారు. ‘నీతో సినిమా చేస్తా… రెడీగా ఉండు’ అంటూ పక్కా ప్లానింగ్తో ప్రిపేర్ అవుతున్నారు. ఎన్టీఆర్లో ఇవేం కనిపించడం లేదు. తనకు బాగా అచ్చొచ్చిన వినాయక్, రాజమౌళిలతో సినిమా చేసి చాలాకాలం అయ్యింది. నిజానికి ఎన్టీఆర్ కాస్త ముందుకు ప్రొసీడ్ అయితే.. ఈ కాంబినేషన్లను సెట్ చేసుకోవొచ్చు. కానీ.. తనవైపు నుంచి చొరవ చూపించడం లేదు. హోం బ్యానర్ అంటూ ఎన్టీఆర్కి ఇప్పటి వరకూ లేకపోవడం.. ఆశ్చర్యాన్ని కలిగిస్తుంది. ఎన్టీఆర్ ఇప్పటికైనా తన లోపాల్ని గుర్తించాలి. తన భవిష్యత్తుకు తానే ఓ మార్గం వేసుకోవాలి. ఎన్టీఆర్ అభిమానులే కాదు, చిత్రపరిశ్రమ కూడా అదే కోరుకొంటోంది.