మావోయిస్టుల కార్యకలాపాలు మళ్ళీ చిన్నగా మొదలౌతున్నాయన్న సంకేతాలు అందడంతో తూర్పుకనుమల్లో తెలంగాణా, చత్తీస్ ఘఢ్, ఒడిస్సా, అంధ్రప్రదేశ్ రాష్ట్రాల సరిహద్దుల్లో పోలీసుల జాయింట్ కూంబింగ్ మొదలైంది. విశాఖ, తూర్పుగోదావరి, పశ్చిమ గోదావరి,ఖమ్మం జిల్లాల బోర్డర్ లో దాదాపు 60 కిలోమీటర్ల పరిధిలో ఈ వెతుకులాట లేదా వేట కొనసాగుతోందని పోలీసు వర్గాల ద్వారా తెలిసింది. పోలీసు కూంబింగ్ ఇపుడు ఉధృతమైన ఫలితంగా దాదాపు 30 గిరిజనగ్రామాల ప్రజలు భయపడిపోతున్నారు. మావోయిస్టుల కార్యకలాపాలు లేకపోవడంతో నాలుగేళ్ళ నుంచీ ప్రశాంతంగా వున్న గిరిజనులకు నక్సల్స్ సమాచారం కోసం పోలీసు వేధింపులు మళ్ళీ మొదలౌతాయి. ఏ హింసాకాండ జరిగినా తమకు పోలీసు చిత్రహింసలు తప్పవన్నది వారి గతానుభవం.
సెప్టెంబరు 21 మావోయిస్టు ఆవిర్భావ దినం. అంతకు ముందు నుంచే ఆవిర్భావ దినోత్సవ పోస్టర్లు గ్రామాల్లో వెలిశాయి. ప్రభుత్వ అక్రమాలు, పోలీసుల దురాగతాల పై పాంప్లెట్లు పంచుతున్నారు. ఇవి మావోయిస్టుల ఉనిక, కార్యకలాపాలకు రుజువులు కావడంతో పోలీసు నిఘా పెరిగింది. గాలింపు ఉదృతమైంది. ఆ నేపధ్ధ్యమే తెలంగాణాలో శివసాగర్ రెడ్డి, శృతి ల ఎన్ కౌంటర్, ఒడిస్సాలో సోరానాధ్, ఆయన అంగరక్షకుల ఎన్ కౌంటర్ కు దారితీసింది. ప్రభుత్వాలు, ప్రభుత్వాధినేతల మధ్య అభిప్రాయబేధాలు వున్నాకూడా మావోయిస్టుల విషయంలో అన్ని రాష్ట్రాల పోలీసులూ ఏకాభిప్రాయంతోనే పనిచేస్తారనడానికి ఈ సంఘటనలే ఉదాహరణలు.
దళాల్లోకి యువతీ యువకులను చేర్చుకునే ప్రయత్నంలోనే మావోయిస్టులు మారుమూల గిరిజన గ్రామాల్లో విస్తృతంగా సంచరిస్తున్నరన్న సమాచారం పోలీసులవద్ద వుంది. ఈ ఏడాది జనవరి నుంచి ఇంతవరకూ తెలంగాణా, ఆంధ్రప్రదేశ్ రాష్ట్రాల్లో నలుగురైదుగురిని చంపివేయడం తో సహా అనేక పబ్లిక్ ఆస్ధులను తగలబెట్టడం లాంటి 40 వరకూ సఘటనల్లో మావోయిస్టుల పాత్ర, ప్రమేయం ఉన్నట్టు గుర్తించారు. ఈ సంఘటనల్లో 44 మందిని మావోయిస్టులు లేదా వారి సానుభూతిపరులను పోలీసులు అరెస్టుచేసి కేసులు పెట్టారు. దాదాపు అందరూ రిమాండు ప్రిజనర్లుగా జైళ్ళలో వున్నారు. వీరిలో 14 మంది తెలంగాణాలో, 30 మంది ఆంధ్రప్రదేశ్ లో నేరాలకు పాల్పడ్డారు.
గతంలో కొన్ని సందర్భాల్లో కీలకమైన మావోయిస్టు నాయకులు పశ్చిమ గోదావరి జిల్లా జంగారెడ్డిగూడెం లాడ్జీల్లో మకాం వేసి కార్యకలాపాలు సాగించిన నేపథ్యంలో జంగారెడ్డిగూడెం పరిసర ప్రాంత అటవీ ప్రాంతంలోనూ పోలీసులు జల్లెడ పడుతున్నారు.
