త‌మిళంలో ఎన్నో సూప‌ర్ డూప‌ర్ హిట్లు ఇచ్చాడు మురుగ‌దాస్. అక్క‌డ మురుగ‌దాస్ అంటే… హీరోలంతా క్యూ క‌ట్టేస్తారు. అదేంటో… తెలుగులో మాత్రం రెండుసార్లూ నిరాశ ప‌రిచాడు. చిరంజీవితో `స్టాలిన్‌` తీశాడు. మహేష్ బాబుని `స్పైడ‌ర్‌`గా మార్చాడు. రెండూ డిజాస్ట‌ర్‌లే. తెలుగులో హిట్టు ఇవ్వ‌లేక‌పోయాన‌న్న లోటు మురుగ‌దాస్‌ని వెంటాడుతోంది. అందుకే ఇప్పుడు మళ్లీ తెలుగులో ఓ సినిమా చేయ‌డానికి ప్ర‌య‌త్నిస్తున్నాడు. ఒక‌రిద్ద‌రు టాప్ హీరోల‌తో మురుగ‌దాస్ ట‌చ్‌లో ఉన్న‌ట్టు తెలుస్తోంది. వాళ్ల‌లో ఒక‌రిని ఎలాగైనా ఒప్పించి, ప్రాజెక్టుని ప‌ట్టాలెక్కించాల‌ని చూస్తున్నాడు.
అయితే మురుగ‌దాస్‌తో సినిమా అంటే.. తెలుగు హీరోలు, వాళ్ల అభిమానులూ భ‌య‌ప‌డుతూనే ఉన్నారు. త‌మిళంలో టాప్ ద‌ర్శ‌కుడైనా స‌రే, తెలుగు ప్రేక్ష‌కుల నాడీని మురుగ‌దాస్ పెద్ద‌గా ప‌ట్టుకోలేక‌పోయాడ‌న్న‌ది అంద‌రి ఆవేద‌న. అలాంట‌ప్పుడు గ‌జిని, తుపాకీ తెలుగులో మంచి వ‌సూళ్లు ఎలా సాధిస్తాయ‌న్న‌ది మురుగ‌దాస్ అభిమానుల ప్ర‌శ్న. అదీ నిజ‌మే. కాక‌పోతే.. తెలుగులో స్ట్రయిట్ సినిమాలు తీస్తున్న‌ప్పుడు మురుగ‌దాస్‌కి టైమ్ క‌ల‌సి రాలేదంతే. ఈసారి మాత్రం… స్క్రీన్ ప్లే జిమ్మిక్కులూ, మైండ్ గేమ్‌లూ లేకుండా ప‌క్కా క‌మ‌ర్షియ‌ల్ సినిమా తీద్దామ‌న్న‌ది మురుగ‌దాస్ ప్లాన్‌. కాక‌పోతే… మ‌న హీరోలంతా ఆల్రెడీ చేతిలో రెండేసి మూడేసి ప్రాజెక్టుల్ని పెట్టుకున్నారు. అవ‌న్నీ అవ్వాలి.. అప్పుడు మురుగ‌ని లైన్‌లోకి దింపాలి. మ‌రి మురుగ‌దాస్ క‌ల ఎప్ప‌టికి నెర‌వేరుతుందో?
