నంద్యాలలో మేమంటే మేమే గెలుస్తామని టిడిపి వైసీపీలు ఘంటాపథంగా చెబుతున్నా ఎవరి అభద్రత వారిని వెన్నాడుతున్నది. జగన్‌ పది రోజులు మకాం చేయడం, ముఖ్యమంత్రి చంద్రబాబు చివరి రెండు రోజులు గడపడం ఇందుకో ఉదాహరణ మాత్రమే. పైగా ముఖ్యమంత్రి రోడ్‌షోలే గాక కుల మత సమావేశాలు కూడా జరిపి సంబంధిత హామీలు కురిపించారు. శాసనమండలికి ముస్లింను చైర్మన్‌ను చేస్తామని చెప్పడం ద్వారా ఫరూక్‌కు పదవీ ప్రసాదం చేసినట్టే. ఇక ఎప్పుడో దాడికి గురైన ముస్లిం కుటుంబాన్ని తీసుకొచ్చి ఎన్నికల్లో మాట్లాడకూడదంటూనే న్యాయం చేస్తామని హామీలిచ్చారు. నిన్నటి వరకూ తమ పార్టీలో వున్న శిల్పా మోహనరెడ్డి సహకార సంఘం చట్టబద్దమైంది కాదని, చర్యలు తీసుకుంటామనికొత్తగా హెచ్చరించారు. మరోవైపున ముఖ్యమంత్రి ప్యాంట్రీ కారును తనిఖీ చేయడమేమిటని ఎన్నికల సంఘానికి టిడిపి ఫిర్యాదు చేసింది. అయితే ఇవన్నీ వున్నా విధుల నిర్వహణ సరిగా లేదని డిఎస్‌పి గోపాలకృష్ణను ఎన్నికల సంఘం బదిలీ చేసింది. 3500 పోలీసులను పోలింగ్‌కు పంపిస్తున్నది. కొద్ది మంది తెలుగుదేశం నేతలను కూడాడబ్బు పంపిణీ కేసుల్లో పోలీసులు అనివార్యంగా అరెస్టు చేయవలసి వచ్చింది. బాలయ్య డబ్బులు పంచుతున్న విడియోను కూడా తీవ్రంగానే పరిశీలిస్తున్నట్టు సమాచారం. అయితే అది ఎన్నికల్లోగా తేలదు.
వైసీపీ నేతలు కూడా డబ్బులు పంచడం, బెట్టింగుల కేసులను ఎదుర్కొంటున్నారు. పోలీసుల తమపైనే దాడి చేస్తూ అధికార పక్షాన్ని వదిలేస్తున్నారని వైసీపీ ఫిర్యాదు చేస్తున్నది. ప్రధాన నేతల ప్రచార శైలిలో పెద్ద మార్పు లేదు గాని ఎంపి మేకపాటి రాజమోహనరెడ్డి మాత్రం భూమా కుటుంబం పట్ల సానుభూతి భాషలో మాట్లాడ్డం కొత్త పరిణామం.చంద్రబాబు గతంలో హరికృష్ణను వాడుకుని వదిలేసినట్టే అఖిల ప్రియకూ జరుగుతుందని చెప్పడం ద్వారా కొంత సానుభూతి పొందే ప్రయత్నం చేశారు. నంద్యాల ఉప ఎన్నిక రెఫరెండం లాటిదని పదే పదే అనడం సరికాదని కూడా వైసీపీలో ఆలోచన మొదలైంది. ఎన్నికలు ఇంకా రెండేళ్లు వుండగా ముందే ముద్ర వేయించుకోవడమెందుకుని కొందరు ప్రశ్నించారట. బహుశా రాజ్‌మోహనరెడ్డి వ్యాఖ్యలు దీనంతటి పలితమే కావచ్చు.
