ముద్ద ప‌ప్పు ఆవ‌కాయ్‌తో అల‌రించింది నిహారిక. న‌టిగా ఆమె ప్ర‌స్థానం వెబ్ సిరీస్‌తోనే మొద‌లైంది. ఇప్ప‌టికీ ఆ అనుబంధం కొన‌సాగుతూనే ఉంది. త్వ‌ర‌లో నిహారిక మరో వెబ్ సిరీస్‌కి శ్రీ‌కారం చుట్ట‌బోతోంది. ఇందులో నిహారిక న‌టించ‌డ‌మే కాదు… నిర్మిస్తోంది కూడా. వెబ్ సిరీస్ అంటే.. ఓ క‌థ‌ని కొన్ని భాగాలుగా చెప్ప‌డం. అయితే ఈసారి ప్ర‌త్యేక‌త ఏమిటంటే.. ప్ర‌తీ భాగంలోనూ ఓ క‌థ ఉంటుంది. వారం వారం కొత్త క‌థ‌తో వెబ్ సిరీస్ న‌డుస్తుంది. ‘అమృతం’ లా అన్న‌మాట.
”గ‌తంలో వ‌చ్చిన అమృతం ఓ ట్రెండ్ సెట్ట‌ర్‌. ప్ర‌తి ఎపిసోడ్‌కీ క‌థ మారిపోయేది. ఈసారి వెబ్ సిరీస్ లో అలాంటి ప్ర‌యోగం చేయ‌బోతున్నాం. ప్ర‌తీ ఎపిసోడ్‌లోనూ ఓ కొత్త క‌థ చూపిస్తాం. కొత్త పాత్ర‌లు వ‌స్తుంటాయి. వంద ఎపిసోడ్ల వ‌ర‌కూ ఈ సిరీస్‌ని అలానే న‌డిపించాల‌ని వుంది” అంటోంది నిహారిక. త‌ను క‌థానాయిక‌గా న‌టించిన ‘సూర్య‌కాంతం’ ఈ శుక్ర‌వారం విడుదల కానుంది. ”నా నుంచి వ‌చ్చిన రెండు సినిమాలూ స‌రిగా ఆడ‌లేదు. వాటికి ర‌క‌ర‌కాల కార‌ణాలు ఉన్నాయి. అయితే క‌థ విష‌యంలో, పాత్ర‌ల ఎంపిక‌ల విష‌యంలోనూ నేనెప్పుడూ త‌ప్పు చేయ‌లేదు. ‘సూర్య‌కాంతం’ కూడా మంచి క‌థే. అయితే ఈసారి నాకు విజ‌యం ద‌క్కుతుంద‌న్న న‌మ్మ‌కం ఉంది” అని చెప్పుకొచ్చింది.
