ఆంధ్రప్రదేశ్‌లో ఫ్రీ వ్యాక్సిన్ ఇస్తామని సర్కార్ ప్రకటించింది. కేంద్రం ఇవ్వకపోయినా కొనుగోలు చేస్తామని.. రూ. పదహారు వందల కోట్లు ఖర్చు చేస్తామని ఘనంగా ప్రకటించారు. ఆ వెంటనే.. విరాళాల సేకరణను కూడా ప్రారంభించారు. కొంత మంది వచ్చి విరాళాలు ఇచ్చిపోయారు. ఇప్పుడు అంతర్గతంగా విరాళాల సేకరణ ప్రారంభమయింది. ఉద్యోగుల జీతంలో ఒక రోజు కోత విధించేందుకు నిర్ణయించారు. విద్యుత్ శాఖలో ఉద్యోగుల ఒక్క రోజు జీతాన్ని వ్యాక్సినేషన్ కోసం ఇస్తున్నట్లుగా సర్క్యులర్ జారీ చేశారు. దీన్ని చూసి ఉద్యోగులకు మండిపోయింది. వెంటనే ఉద్యోగ సంఘాల నేతలను నిలదీశారు. వారేమో.. అమ్మతోడు మాకు చెప్పలేదని… తమ ఉద్యోగులకు సర్ది చెప్పుకోవాల్సి వస్తోంది.
అయినా వినకపోవడంతో.. వారు మీడియాకు తమ అసంతృప్తి గురించి తెలియచెబుతున్నారు. ఒక్క రోజు జీతం కోతపై వ్యతిరేక వ్యాఖ్యలు చేస్తున్నారు. కొవిడ్‌ వ్యాక్సినేషన్ కోసం విద్యుత్ ఉద్యోగుల నుంచి.. ఒకరోజు వేతనం కట్ చేస్తున్నట్లు సీఎండీ ఇచ్చిన సర్క్యులర్‌ను వ్యతిరేకిస్తున్నట్లు విద్యుత్ ఉద్యోగ సంఘాల జేఏసీ ప్రకటించింది. విరాళం ఇస్తామో లేదో తర్వాత.. కానీ అసలు తమ అనుమతి లేకుండా.. తమ జీతంలో ఒకరోజు ఎలా విరాళం ప్రకటించేసుకుంటారని మండిపడుతున్నారు. ఈ మేరకు సీఎండీకి విద్యుత్ సంఘాల జేఏసీ నేతలు లేఖ రాశారు. మా అనుమతి లేకుండా, కనీసం సంప్రదించకుండా.. వేతనాలు ఎలా కట్ చేస్తారని…తక్షణం సర్క్యులర్‌ను వెనక్కి తీసుకోవాలని డిమాండ్ చేశారు.
ఉద్యోగులందరి జీతాల్లో ఒక్క రోజు వేతనాన్ని తీసుకోవాలన్న ఆలోనచలో ప్రభుత్వం ఉంది. అయితే.. ఇప్పటికి పీఆర్సీ ఇవ్వకపోవడం.. డీఎలు కట్ చేయడం.. ఇస్తామన్నవి ఇవ్వకపోవడంతో… వారు అసంతృప్తిలో ఉన్నారు. ఇంకా వాటికని.. వీటికని …వారి జీతాల్ని విరాళాల ఖాతాలో వేసుకోవడం వారిని అసంతృప్తికి గురి చేస్తోంది. అయితే ఉద్యోగ సంఘాల నేతలు మాత్రం.. ప్రభుత్వానికే మద్దతుగా ఉన్నారు. దీంతో ఉద్యోగులకు ఇష్టం ఉన్నా లేకపోయినా ఒక రోజు వేతనం కట్ కావడం ఖాయంగా కనిపిస్తోంది.
