తిరుపతి ఉపఎన్నికకు టీడీపీ అభ్యర్థిగా పనబాక లక్ష్మిని చంద్రబాబు ఖరారు చేశారు. వారం రోజులు గడుస్తున్నా.. ఆమె వైపు నుంచి అధికారిక స్పందన రాలేదు. దీంతో ఆమె పోటీకి విముఖత చూపుతున్నారన్న ప్రచారాన్ని ఇతర పార్టీలు ప్రారంభించాయి. సోషల్ మీడియాలో ఇదే హాట్ టాపిక్ అయింది. అయితే.. తమ కుమార్తె వివాహ నిశ్చితార్థం కారణంగానే సైలెంట్‌గా ఉన్నామని.. ఎన్నికల బరిలోకి దిగడానికి పూర్తి స్థాయిలో సిద్ధంగా ఉన్నామంటూ.. వారు ఇద్దరూ వెళ్లి.. మాజీ మంత్రి సోమిరెడ్డిచంద్రమోహన్ రెడ్డికి స్పష్టం చేశారు. తమ అభ్యర్థిత్వంపై అనుమానాలు పెట్టుకోవాల్సిన పని లేదని.. రేపో ఎల్లుండో చంద్రబాబును కలిసిన తర్వాత.. ప్రచారాన్ని కూడా ప్రారంభిస్తామని వారు సోమిరెడ్డికి చెప్పినట్లుగా తెలుస్తోంది.
నవంబర్ 28న తిరుమలలో దర్శనం చేసుకున్న అనంతరం ఎన్నికల ప్రచారానికి శ్రీకారం చుట్టాలని పనబాక లక్ష్మి ముహుర్తం ఖరారు చేసుకున్నారు. గత ఎన్నికల్లో తిరుపతి నుంచి టీడీపీ తరపునే పోటీ చేసిన పనబాక లక్ష్మి.. రెండులక్షలకుపైగా ఓట్ల తేడాతో ఓడిపోయారు. ఆ తర్వాత రాజకీయాల్లో యాక్టివ్‌గా లేరు. తెలుగుదేశం కార్యక్రమాల్లోనూ పాల్గొన్నట్లుగా ఎక్కడా లేదు. అయితే.. అభ్యర్థిగా అమెకే చాన్సిచ్చారు చంద్రబాబు. అలా ఖరారు చేసే ముందు ఆమెతో మాట్లాడారో లేదో స్పష్టత లేదు కానీ..ఆమె మాత్రం.. ఇప్పటి వరకూ మౌనం పాటిస్తున్నారు.
అయితే అభ్యర్థితో సంబంధం లేకుండా.. ఏడు నియోజకవర్గాలకు సంబంధించి గ్రామం నుంచి నియోజకవర్గ స్థాయి వరకూ ప్రత్యేకంగా కమిటీల్ని నియమించి ప్రచార వ్యూహాన్ని టీడీపీ అధినేత ఖరారు చేస్తున్నారు. ఇందు కోసం టీడీపీ కార్యాలయంలో ప్రత్యేకంగా ఓ టీంను ఏర్పాటు చేశారు. వారు సమన్వయం చేయనున్నారు. టీడీపీ అభ్యర్థి సైలెంట్‌గా ఉంటే..ఇతర పార్టీలు లేనిపోని ప్రచారాలు చేస్తాయని.. ఆమె ఎంత యాక్టివ్ అయితే అంత ప్లస్ అని.. ఆ పార్టీ వర్గాలు టెన్షన్ పడుతున్నాయి.
