ప్ర‌భాస్ ద్విపాత్రాభిన‌యం?

ప్ర‌భాస్ – నాగ అశ్విన్ కాంబినేష‌న్‌లో ఓ చిత్రం రూపుదిద్దుకుంటున్న సంగ‌తి తెలిసిందే. వైజ‌యంతీ మూవీస్ ఈ చిత్రాన్ని భారీ వ్య‌యంతో తెర‌కెక్కించ‌బోతోంది. దాదాపు 250 కోట్ల‌తో పాన్ ఇండియా స్థాయిలో ఈ చిత్రాన్ని నిర్మిస్తున్నారు. ఇదో సైన్స్ ఫిక్ష‌న్ అని, జాన ప‌ద క‌థ అని ర‌క‌ర‌కాల వార్త‌లు వినిపిస్తున్నాయి. ఇప్పుడు మ‌రో ఆస‌క్తి క‌ర‌మైన విష‌యం బ‌య‌ట‌కు వ‌చ్చింది. ఈచిత్రంలో ప్ర‌భాస్ ద్విపాత్రాభిన‌యం చేస్తున్నాడ‌ట‌. ఒకేసారి రెండు విభిన్న‌మైన కాలాల‌లో జ‌రిగే క‌థ ఇద‌ని, ఆ రెండు పాత్ర‌లూ పురాణ పురుషుల్ని పోలి ఉంటాయ‌ని, రెండు పాత్ర‌ల్లోనూ ప్ర‌భాస్ క‌నిపిస్తాడ‌ని తెలుస్తోంది. ఈ రెండు క‌థ‌ల్ని, రెండు పాత్ర‌ల్నీ నాగ అశ్విన్ ఎలా క‌లిపాడ‌న్న‌ది ఆస‌క్తిగా ఉంటుంద‌ట‌. ఈ సినిమా కోసం భారీ సెట్స్ అవ‌స‌రం. వాటికి సంబంధించిన క‌స‌ర‌త్తులు ఇప్పుడు మొద‌ల‌య్యాయి. ఈనెలాఖ‌రున షూటింగ్ మొద‌లుకావ‌ల్సివుంది. అయితే ప్ర‌స్తుత ప‌రిస్థితుల దృష్ట్యా అది సాధ్యం కాక‌పోవొచ్చు. ఈ చిత్రాన్ని ఇదే నెల‌లో లాంఛ‌నంగా మొద‌లెట్టి, అక్టోబ‌రులో కొన్ని స‌న్నివేశాల్ని తీసే ప్ర‌య‌త్నాలు జ‌రుగుతున్నాయి. అయితే అది కూడా ప‌రిస్థితులు అనుకూలిస్తేనే. లేదంటే 2021 ప్ర‌ధ‌మార్థంలోనే ఈ సినిమా ప‌ట్టాలెక్కుతుంది.