ఖమ్మం జిల్లా పాలేరు ఎమ్మెల్యే స్థానానికి ఉప ఎన్నిక అనివార్యంగా మారింది. అక్కడ రణభేరి మోగింది. నామినేషన్ల పర్వం కూడా పూర్తయింది. ప్రస్తుతానికి వాతావరణం గమనిస్తే మాత్రం.. గులాబీ పార్టీకే అనుకూల సంకేతాలు ఉన్నాయని విశ్లేషకులు భావిస్తున్నారు. కాంగ్రెస్‌ పార్టీ.. తమకు చెందిన ఈ సీటును ఏకగ్రీవంగా దక్కించుకోవడానికి చేసిన ప్రయత్నాలు బెడిసికొట్టి, చాలా పంతానికి పోయి.. పట్టుదలగా ఇప్పుడు పోరాడుతున్నది. తెలుగుదేశం, వైకాపాల మద్దతు కూడా కూడగట్టుకుని.. గెలవాలని ఆరాటపడుతున్నది. ఈ నేపథ్యంలో నామినేషన్లు వేసిన రోజున ఆ పార్టీకి చెందిన కొందరు నాయకులు చేసిన ఆరోపణలు, వ్యాఖ్యానాలు భిన్నమైన అనుమానాలు రేకెత్తిస్తున్నాయి. వారికి గెలుపు మీద నమ్మకం సన్నగిల్లుతూ, ఇప్పటినుంచే సాకులు వెతుక్కోవడానికి ప్రయత్నిస్తున్నారేమో, పార్టీ పోటీలో ఉన్నా.. వారి శ్రేణులు గులాబీ అనుకూలంగా మారుతున్నాయేమో అనే అభిప్రాయం కలుగుతోంది.
నామినేషన్ల సందర్భంగా ఖమ్మంలో కాంగ్రెస్‌ పార్టీ ఓ సభ పెట్టింది. ఆ సభలో ప్రస్తుతం ఎన్నికల బాధ్యత భుజాన వేసుకున్న కాంగ్రెస్‌ వర్కింగ్‌ ప్రెసిడెంట్‌ మల్లు భట్టి విక్రమార్క మాట్లాడుతూ.. కేసీఆర్‌ కోట్ల రూపాయలు పంపిస్తూ ఉంటే.. స్థానికంగా నేతలు, అధికారుల్ని తెరాస వారు కొనుక్కుంటూ ఉన్నారని ఆరోపించారు.
ఈ మాటలు చూస్తే.. పాలేరులో కూడా కాంగ్రెస్‌ శ్రేణులు కట్టుతప్పిపోతున్నాయేమో అనే అనుమానం కలుగుతోంది. గులాబీ ఆకర్ష పథకానికి పాలేరు స్థానిక కాంగ్రెస్‌ నాయకులు అటువైపు వెళ్లిపోతున్నారేమోనని, ఆ అక్కసు ఆపుకోలేకనే మల్లు భట్టి విక్రమార్క ఇలాంటి విమర్శలు చేసి ఉండవచ్చునని పలువురు భావిస్తున్నారు. అయితే జనానికి కలుగుతున్న సందేహం ఏంటంటే.. అసలు భట్టి ఆరోపణల్లో నిజం ఉన్నదా? నిజంగానే గులాబీ శ్రేణులు డబ్బు ఎర వేసి స్థానిక కాంగ్రెస్‌ నేతల్ని కొనుక్కుంటున్నారా? లేదా, భవిష్యత్తులో ప్రాప్తించబోయే ఓటమికి సంబంధించి ఇప్పటినుంచే కాంగ్రెస్‌ వారు సాకులు, కారణాలు సిద్ధం చేసుకుంటున్నారా? అని! కాంగ్రెస్‌లోనే ఐక్యత లేదని, ఇంకా నేతల మధ్య విభేదాలున్నాయని.. ఇన్నింటి మధ్య ఓటమి అనివార్యమైతే దానిని ”కేసీఆర్‌ కోట్లు, కొనుగోళ్లు” అంటూ అటు నెట్టేయడానికి ప్రయత్నం జరుగుతున్నదని పలువురు భావిస్తున్నారు.
