చిరంజీవి 150వ సినిమా కోస చాలా మంది కర్చీఫ్ లు వేశారు. అయితే వాళ్ల‌లో కొంత‌మందికే అవ‌కాశం ద‌క్కింది. ఇప్పుడు 151వ సినిమా వంతు వచ్చింది. సురేంద‌ర్ రెడ్డి ద‌ర్శ‌క‌త్వం వ‌హిస్తున్న ఈ చిత్రం త్వ‌ర‌లో ప్రారంభం కానుంది. ఈ సినిమా కోసం కూడా క‌ర్చీఫ్‌లు సిద్ధ‌మైపోతున్నాయి. చిరు అభిమాని, ఆయ‌న‌కు ఇష్టుడు లారెన్స్ కూడా ఓ కర్చీఫ్ వేశాడు. చిరుతో మ‌ళ్లీ ప‌నిచేయాల‌నివుంది అంటున్నాడు ఈ డాన్స్ మాస్ట‌ర్ క‌మ్ డైరెక్ట‌ర్ క‌మ్ యాక్ట‌ర్‌. ”చిరు అన్న‌య్య 150వ సినిమా చేస్తున్న‌ప్పుడు అన్న‌య్య నుంచి నాకు ఫోన్ వచ్చింది. ‘నేను చిరంజీవి మాట్లాడుతున్నా.. త‌మ‌రి అప్పాయింట్ మెంట్ కావాలి’ అంటూ అన్న‌య్య గొంతు వినిపించింది. అన్న‌య్య అడ‌గ్గానే వ‌చ్చి ర‌త్తాలు ర‌త్తాలు పాట‌కు డాన్స్ కంపోజ్ చేశా. ఆ పాట చాలా హిట్ అయ్యింది. చిరు అన్న‌య్య మ‌రిన్ని సినిమాలు చేయాలి.. ఆయ‌న‌తో మ‌ళ్లీ మ‌ళ్లీ ప‌ని చేయాల‌నివుంది” అంటున్నాడు లారెన్స్.
త‌ను క‌థానాయ‌కుడిగా న‌టించిన శివ‌గంగ ఈ శుక్ర‌వారం విడుద‌ల అవుతుంది. ఈ సినిమాపై చాలా న‌మ్మ‌కంగా ఉన్నాడు లారెన్స్. ”సాధార‌ణంగా మ‌న సినిమాల్లో సినిమా మొద‌లైన పావుగంట‌కు గానీ క‌థ మొద‌ల‌వ్వ‌దు. `శివ‌గంగ` అలా కాదు. సినిమాలోని తొలి స‌న్నివేశంతోనే క‌థ చెబుతున్నాం. ఈ సినిమాలో హీరో నేను కాదు. రితికా సింగ్. విశ్రాంతి స‌న్నివేశంలో ఆమె న‌ట‌న గురించి అంద‌రూ మాట్లాడుకొంటారు. అంత అద్భుతంగా న‌టించింది” అంటున్నాడు లారెన్స్. గంగ త‌ర‌వాత లారెన్స్ నుంచి ఓ సినిమా రావ‌డం ఇదే. దాంతో ఈసినిమాపై చాలా అంచ‌నాలు ఏర్ప‌డ్డాయి. మ‌రి వాటిని శివ‌గంగ ఎంత వ‌ర‌కూ అందుకొంటుందో చూడాలి.
