శంకర్పై రజనీ అభిమానులకు కొండంత కోపం ఉండొచ్చు. ఎందుకంటే ‘రోబో 2.0’ని బాగా లేట్ చేస్తున్నాడుగా. ఈ సినిమా ఎప్పుడొస్తుందా అని ఎదురు చూసి, ఎదురుచూసి విసిగిపోయారంతా. వాళ్లందరూ ఇప్పుడు ‘కాలా’ హడావుడిలో పడిపోయారు. ‘కాలా’ ముచ్చట్లలో ఉన్న రజనీ ఫ్యాన్స్కి ‘రోబో 2.0’ ఓ సర్ప్రైజ్ ఇచ్చింది. మేకింగ్ వీడియోని విడుదల చేసి. మేకింగ్ వీడియో అంటే సెట్లో ఏం జరిగిందో అది చూపించడానికి ఇష్టపడతారు. కానీ సినిమాలో ఏముందో.. దాన్ని విజువల్గా ఎలా చూపిస్తారో… అవన్నీ ఈ మేకింగ్ వీడియోలో కనిపించాయి. యానిమేషన్ రూపంలో ఈ సినిమాలోని కొన్ని కీలకమైన సన్నివేశాల్ని చూపించేశాడు శంకర్. పేరుకి యానిమేషన్ అయినా, తెరపై అవన్నీ ఏ స్థాయిలో ఉంటాయో ప్రేక్షకులు ఊహించుకోవొచ్చు. సినిమా కథ, అందులోని సన్నివేశం ముందే తెలిసిపోతే.. సినిమా చూస్తున్నప్పుడు ఆ కిక్ ఉండదని దర్శక నిర్మాతలు భావిస్తుంటారు. తన కథలన్నీ ముందే చెప్పేసే రాజమౌళి సైతం `బాహుబలి` గురించి ఒక్క ముక్క కూడా చెప్పకుండా జాగ్రత్త పడ్డాడు. కానీ శంకర్ మాత్రం మేకింగ్ వీడియోల పేరుతో… సినిమాలోకి కంటెంట్ని ముందే చూపించడానికి సాహసిస్తున్నాడు. నిజంగా ఈ ధైర్యాన్ని మెచ్చుకోవాల్సిందే. శంకర్ విజన్ అద్భుతంగా ఉంటుంది. అది రోబో 2.0 మేకింగ్ వీడియోలో మరోసారి కనిపించింది. ఈ మేకింగ్ వీడియోలో ఉన్నది కేవలం.. ఓ నమూనా మాత్రమే. దాన్ని శంకర్ ఏ స్థాయిలో తీశాడో అని అభిమానులంతా చర్చించుకుంటున్నారిప్పుడు. వాళ్లందరి అంచనాలూ నిజమైతే… ‘రోబో 2’ ఎవ్వరికీ అందని అద్భుతాలు సృష్టించడం ఖాయం.