చిరుత సినిమాతో ఎంట్రీ ఇచ్చిన రామ్ చరణ్ మగధీరతో ఎక్కడికో వెళ్ళిపోయాడు. రెండు సినిమాలతోనే నంబర్ ఒన్ హీరో రేసులోకి రామ్ చరణ్‌ని తీసుకొచ్చేసింది మీడియా. ఆ తర్వాత ఆరెంజ్ సినిమా రిజల్ట్ విషయం పక్కన పెడితే రచ్చ నుంచి వరుస హిట్స్‌తో దూసుకెళ్ళాడు. రెగ్యులర్ మాస్ మసాల సినిమాలతోనే కలెక్షన్స్ కొల్లగొట్టాడు. పెద్దగా విషయంలేని కథలు, డైరెక్షన్‌లో ఏ స్పెషాలిటీ లేకపోయినప్పటికీ సినిమాలు మాత్రం సూపర్ హిట్స్ అయ్యాయి. దాంతో రామ్ చరణ్ స్టామినా గురించి చాలా మంది చాలా ఎక్కువ చెప్పేశారు. ఆ టైంలోనే విమర్శలను వెంట్రుక ముక్క కింద తీసిపడేశాడు చరణ్. సాఫ్ట్‌వేర్ ఇంజినీర్స్‌ ఇష్యూతో పాటు ఇంకా చాలా ఇన్సిడెంట్స్ అన్నీ కలిసి రామ్ చరణ్ బిహేవియర్ గురించి ప్రేక్షకులకు కూడా నెగిటివ్ అభిప్రాయం కలిగేలా చేశాయి.
కానీ అదంతా గతం. ఇప్పుడు రామ్ చరణ్‌లో ఎవ్వరూ ఊహించలేనంత మార్పు కనిపిస్తోంది. స్టార్ హోటల్‌లో జరిగిన చిరంజీవి బర్త్ డే పార్టీ సెలబ్రేషన్స్‌లో మీడియాను సరిగా ట్రీట్ చేయలేదు. జర్నలిస్టులందరూ కూడా అవమానంగా ఫీలయ్యారు. ఆ విషయం తెలుసుకున్న రామ్ చరణ్ జర్నలిస్టులకు సారీ చెప్పాడు. అలాగే చిరంజీవి బర్త్ డే సెలబ్రేషన్స్‌కి బ్రహ్మాండమైన కవరేజ్ ఇచ్చిన మీడియాకు థ్యాంక్స్ కూడా చెప్పాడు. విమర్శలను వెంట్రుకతో సమానంగా తీసిపడేసిన రామ్ చరణ్‌కి ఇప్పుడు ఆ విమర్శల ఇంపాక్ట్ ఏ రేంజ్‌లో ఉంటుందో బాగానే తెలిసొచ్చినట్టుంది. రామ్ చరణ్‌లో వచ్చిన మార్పు మాత్రం చరణ్ కెరీర్‌కి చాలా హెల్ప్ అవుతుందనడంలో సందేహం లేదు. విమర్శలు వచ్చినప్పుడు ఎంత హుందాగా సమాధానం చెప్పొచ్చు, అనవసరమైన ఇష్యూస్‌లో తల దూర్చకుండా కెరీర్‌లో టాప్ పొజిషన్‌కి ఎలా వెళ్ళాలి లాంటి వాటికి గైడ్ లాంటి చిరంజీవి కెరీర్‌, ఆలోచనలను స్టడీ చేస్తే రామ్ చరణ్ ఇంకా చాలా మంచి విషయాలు నేర్చుకోవచ్చు.
