ఇవాళ్టితో ఎన్నికల ప్రచార పర్వం ముగుస్తుంది. రోడ్ షోలు, మైకుల మోత, జన సమీకరణలు ఇవన్నీ బంద్. ఈ సందర్భంగా వైకాపా అధినేత జగన్మోహన్ రెడ్డి నిర్వహించిన ప్రచార సభలకు సంబంధించిన ఒక ఆసక్తికర అంశం ఇప్పుడు రాజకీయ వర్గాల్లో వినిపిస్తోంది. జగన్ ఎక్కడ సభ పెట్టినా… జనమే జనం అన్నట్టుగా మీడియాలో చూపించేవారు. డ్రోన్ కెమెరా షాట్స్ తో దారిపొడవునా జనాలే జనాలు అన్నట్టుగా సాక్షి ఛానెల్ ప్రసారం చేస్తుండేది. కొన్ని ఇతర న్యూస్ ఛానెల్స్ కూడా సాక్షి టీవీ ప్రసారాల డౌన్ లింక్ తీసుకుని, అవే విజువల్స్ వార్తల్లో చూపిస్తుండేవి. ఇక, సాక్షి పత్రికలో ఏ ఫొటో రైటప్ చూసినా ఒక వాక్యం కామన్ గా ఉంటూ వచ్చేది. అదే… ‘జగన్ సభకు హాజరైన జన సందోహంలో ఒక భాగం’ అనే వాక్యం.
ఇంతమంది జనాలు కనిపించేలా వైకాపా వర్గాల జనసమీకరణ ఒక ఎత్తు అయితే… జగన్ ప్రసంగించాల్సిన వేదికలను ఎంపిక చేయడంలోనే వైకాపా వ్యూహకర్తలు జాగ్రత్త వహించారట. ఒక్కసారి జగన్ ప్రచార సరళిని గమనిస్తే… ఆయన ఎక్కువగా సభలు నిర్వహించిన ప్రదేశాలు ఏవి..? జంక్షన్లు, రోడ్లు మీదే. భారీ బహిరంగ సభలు చాలా తక్కువ. మైదానాల్లో పెద్ద వేదికలు ఏర్పాటు చేసిందీ తక్కువ. ఇదంతా వ్యూహాత్మకంగా జరిగిందట. ఏంటా వ్యూహమంటే… ఒక గ్రౌండ్ లో సభ నిర్వహించాలంటే పెద్ద సంఖ్యలో జన సమీకరణ చేసి నింపాల్సి ఉంటుంది. ఏమాత్రం తేడా కొట్టినా.. టీడీపీ వర్గాలు తీవ్రంగా ప్రచారం చేసేసుకుంటాయి. అందులో సగం వ్యయప్రయాలసతోనే సభలు నిర్వహించాలని అనుకున్నారట.
కాబట్టి, వీలైనంత వరకూ సభలన్నీ ఇరుకు రోడ్లు, జంక్షన్లలో నిర్వహించాలన్నది వ్యూహమట. ఇరుకు రోడ్లు అయితే జనాలను ఈజీగా నింపొచ్చు. పైగా, ఈ చివర నుంచి ఆ చివర వరకూ జనాలే జనాలు అన్నట్టుగా కనిపిస్తారు. ఒక గ్రౌండ్ లో సభకు జనసమీకరణ చేయడం కంటే.. ఒక వీధిలో అంతకంటే తక్కువ సంఖ్యలో జనాలుంటే చాలు. మొత్తం నిండిపోయినట్టు ఉంటుందనేది వ్యూహమట. వీధుల్లో అయితే డ్రోన్స్ కి అనువుగా ఉంటుందనీ, డ్రోన్ షాట్ కి కొంత ట్రావెల్ టైమ్ ఉంటుందనీ, ఆ విజువల్స్ స్క్రీన్ మీదకి వచ్చేసరికి… ఇంత జనమా.. అనే ఇంపాక్ట్ ఉంటుందని ప్లాన్ చేశారట. స్టిల్ ఫొటోలకు కూడా రోడ్ల మీద అయితేనే కనుచూపుమేర జనం ఉన్నట్టుగా ఇమేజెస్ వస్తాయనీ ముందుగానే కేలిక్యులేట్ చేశారట. అందుకే, వీలైనంత వరకూ ఇరుకు సందులే సభావేదికలుగా పెట్టుకున్నారనీ, చివరికి ఆ సందుల్లో గోడలు విరిగిపడుతున్నా, ప్రజలకు గాయాలౌతున్నా వ్యూహం మార్చుకోలేదని సమాచారం.ఇక, ఈ సందుల్లో కూడా జనాలను గ్రాఫిక్స్ తో నింపారనే విమర్శలూ కొన్ని సోషల్ మీడియాలో హల్ చల్ చేసిన సంగతి తెలిసిందే.
