తన సినిమాకి మార్కెట్ ఎలా చేసుకోవాలో వ‌ర్మ‌కి తెలిసినంత‌గా ఎవ్వ‌రికీ తెలీదేమో..?? ‘నోటు’తో కాకుండా కేవ‌లం నోటి మాట‌తోనే ప‌బ్లిసిటీని పీక్స్ కి తీసుకెళ్లిపోతాడు. ‘వంగవీటి’ సినిమా కోసం ఎలాంటి ప్ర‌త్యేక‌మైన ప‌బ్లిసిటీ అవ‌స‌రం లేకుండా పోయింది. ఆ పేరే… ఆ సినిమాకి కావ‌ల్సినంత హైప్ తీసుకొచ్చేసింది. అయినా స‌రే.. వర్మ వ‌ద‌ల‌డం లేదు. ఎలాగైనా స‌రే.. ఆ సినిమా క్రేజ్‌ని ఒక్క‌సారిగా ప‌దింత‌ల‌కుతీసుకెళ్లిపోవాల‌ని ప్లాన్ చేశాడు. అది అట్టాంటిట్టాంటి ప్లాన్ కాదు. మాస్ట‌ర్ ప్లాన్. ఒక విధంగా మెగాస్టార్ ప్లాన్.
వంగవీటి ప్ర‌మోష‌న్ల కోసం వర్మ ఏకంగా బిగ్ బీ అమితాబ్ బ‌చ్చ‌న్‌ని రంగంలోకి దించుతున్నాడు. అస‌లు ఈ సినిమాకీ బిగ్‌కీ అస్స‌లు సంబంధం లేదు.కానీ తెలివిగా వర్మ ఓ పోగ్రాం డిజైన్ చేశాడు. దీనికి అక్ష‌రాలా కోటి రూపాయ‌లు ఖ‌ర్చు చేస్తున్న‌ట్టు టాక్‌. ‘శివ టూ వంగవీటి’ అనే పేరుతో ఈనెల 20న హైదరాబాద్ లో వర్మ ఓ కార్య‌క్ర‌మాన్ని నిర్వ‌హిస్తున్నాడు. శివ తన తొలి చిత్రం. ప్ర‌స్తుతం బాలీవుడ్‌లో స‌ర్కార్ 3 తీస్తున్నాడు. ఈ మ‌ధ్య ప్ర‌యాణాన్ని విశ్లేషించే కార్య‌క్ర‌మం అన్న‌మాట. ఇందులో నాగార్జున నుంచి అమితాబ్ బ‌చ్చ‌న్ వ‌ర‌కూ వ‌ర్మ‌తో ప‌నిచేసిన న‌టీన‌టులు, టెక్నీషియ‌న్లు అంతా పాలు పంచుకోబోతున్నారు. ఈ ఈవెంట్‌లోనే వర్మ తన వంగవీటి ప్లాటిన‌మ్ డిస్క్ ఫంక్ష‌న్ చేయ‌బోతున్నాడు. నిజానికి ఈ బృహ‌త్త‌ర కార్య‌క్ర‌మం చేప‌ట్టింది వంగవీటి కోస‌మే. అమితాబ్ బ‌చ్చ‌న్ దిగి వ‌చ్చి… వర్మ గురించి మాట్లాడితే కావ‌ల్సినంత ప‌బ్లిసిటీ క‌దా. అదీ.. వర్మ వేసిన మెగా స్కెచ్‌!
