మ‌న ‘పోకిరి’ని బాలీవుడ్‌లో `వాంటెడ్‌’ పేరుతో రీమేక్ చేసి సూప‌ర్ హిట్టు కొట్టాడు సల్మాన్ ఖాన్. అప్ప‌టి నుంచీ పూరి నుంచి ఏ సినిమా వ‌చ్చినా, సల్మాన్ ఖాన్ దృష్టి అటువైపు ప‌డిపోతుంటుంది. ఈ సినిమాతోనే పూరి బాలీవుడ్‌లోనూ పాపుల‌ర్ అయ్యాడు. అలా.. అమితాబ్ బ‌చ్చ‌న్ తో సినిమా చేశాడు. ఇప్పుడు మ‌రోసారి పూరి పేరు బాలీవుడ్‌లో వినిపిస్తోంది. పూరితో సినిమా చేయ‌డానికి సల్మాన్ ఖాన్ సైతం ఆస‌క్తి చూపిస్తున్నాడు.
సల్మాన్ ఖాన్ తాజా చిత్రం ‘ద‌బాంగ్ 3’ ఈ డిసెంబ‌రులో విడుద‌ల కానుంది. ఈలోగా ప్ర‌మోష‌న్ల‌నీ ముమ్మ‌రం చేశాడు సల్మాన్ ఖాన్. ఈ సంద‌ర్భంగా హైద‌రాబాద్‌లోని పాత్రికేయుల‌తో వీడియో కాన్ఫిరెన్స్ ద్వారా మాట్లాడాడు సల్మాన్. అందులో భాగంగా పూరి జ‌గ‌న్నాథ్‌తో సినిమా తీయొచ్చు క‌దా? ఆ అవ‌కాశం ఉందా? అనే ప్ర‌శ్న స‌ల్మాన్‌కి ఎదురైంది. ”త్వ‌ర‌లోనే నేనూ, ప్ర‌భుదేవా హైద‌రాబాద్ వ‌స్తాం. అప్పుడు పూరిసార్‌ని క‌లుస్తాం. అన్నీ కుదిరితే సినిమా కూడా ఉంటుంది” అని స‌మాధానం చెప్పాడు సల్మాన్. ద‌క్షిణాది క‌థ‌ల‌పై బాలీవుడ్ హీరోలు ఎక్కువ మ‌క్కువ చూపిస్తున్నారు. ఇక్క‌డి ద‌ర్శ‌కులు అక్క‌డ హిట్లు కొడుతున్నారు. ఈ నేప‌థ్యంలో పూరి – సల్మాన్ కాంబో కుదిరిపోయినా ఆశ్చ‌ర్య‌పోన‌వ‌స‌రం లేదు.
