శ్రుతి హాస‌న్‌ తెలుగులో ఓ సినిమా చేసి చాలా కాల‌మైంది. అలాగ‌ని మిగిలిన భాష‌ల్లో తానేదో బిజీ బిజీగా ఉన్న‌ట్టు కాదు. అన్ని చోట్లా ఆమెకు గుర్తింపు ఉన్నా, ఒక్క చోట ఒక్క సినిమా కూడా ద‌క్కించుకోలేకపోయింది. దాదాపుగా ఫేడ‌వుట్ అయిపోతున్న క‌థానాయిక‌ల్లో శ్రుతి కూడా చేరిపోయింది. అయితే…. చిరంజీవి – కొర‌టాల శివ సినిమాలో ఆమెకు ఛాన్స్ వ‌చ్చింద‌ని, ఇది త‌న‌కు రీ ఎంట్రీ లాంటి సినిమా అని చెప్పుకున్నారు. అయితే ఆ సినిమా అవ‌కాశం కూడా తృటిలో త‌ప్పిపోయింది. కొర‌టాల శివ సినిమా కోసం శ్రుతి పేరు ప‌రిశీలించిన మాట వాస్త‌వ‌మే. అయితే… చిరు ప‌క్క‌న శ్రుతి జోడీ అంత క‌రెక్ట్ కాద‌ని కొర‌టాల భావించాడ‌ని, అందుకే.. శ్రుతి పేరు ప‌క్క‌న పెట్టేశార‌ని రూఢీ అయ్యింది. ఇప్పుడు శ్రుతి చేతిలో ఒక్క తెలుగు సినిమా కూడా లేదు. ఈ విష‌యాన్ని శ్రుతి కూడా ఒప్పుకుంది. అయితే.. త‌న‌కు అవ‌కాశాలు రావ‌డం లేద‌న్న బెంగ లేద‌ని, తన దృష్టి పూర్తిగా సంగీతంపైనే ఉంద‌ని, న‌టిగా త‌న‌కు మరో బ్రేక్ త‌ప్ప‌కుండా వ‌స్తుంద‌ని గ‌ట్టిగా న‌మ్ముతోంది. ప్ర‌స్తుతం ఉన్న ప‌రిస్థితుల్లో శ్రుతి మ‌ళ్లీ రేజ్‌లోకి రావ‌డం కష్టమే. దాదాపుగా త‌న‌కు అవ‌కాశాలు మూసుకుపోయిన‌ట్టే.
శ్రుతికి ఆ ఛాన్స్ కూడా మిస్స‌యిపోయింది
