ఇబ్బందుల్లో ఉన్న ప్రభుత్వాన్ని చిక్కుల్లో పెట్టడానికి అందుబాటులో ఉన్న వీలైన అవకాశాలకు తెలుగుదేశం పార్టీ మరింత దూకుడుగా వెళ్తోంది. ఈ సారి కోర్టు ధిక్కరణ వ్యూహాన్ని అమలు చేస్తోంది. వారం రోజుల కిందట.. హైకోర్టు… ప్రభుత్వ భవనాలపై ఉన్న రంగులన్నింటినీ.. పది రోజుల్లోపు తొలగించాలని ఆదేశించింది. తొలగించకపోతే.. సంబంధిత అధికారుల్ని బాధ్యుల్ని చేస్తామని.. హెచ్చరించింది. పది రోజుల్లోగా తొలగించి ప్రమాణ పత్రం దాఖలు చేయాలని స్పష్టం చేసింది. ఇప్పటి వారం రోజులు అయింది. కానీ… ప్రభుత్వ భవనాలపై ఉన్న రంగులన్నీ ఎక్కడివక్కడే ఉన్నాయి.
ప్రభుత్వ కార్యాలయాలపై ఉన్న రంగులను తొలగించే ప్రయత్నమే జరగలేదు. సీఎస్ కూడా.. ఓ చిన్న మెమో జారీ చేసి.. సైలెంట్ గా ఉండిపోయారు. తెలుగుదేశం పార్టీ ఈ అంశంపై దృష్టి పెట్టినట్లుగా తెలుస్తోంది. గ్రామాల్లో ఉన్న తమ క్యాడర్ అందరికీ… రంగులున్న భవనాల ఫోటోలు పంపాలని సమాచారం ఇస్తోంది. ఆ మేరకు.. మొత్తం సమాచారాన్ని సేకరించి.. ఎస్ఈసీ ఎన్నికల కోడ్‌ను అమలు చేయలేకపోతోందని.. ప్రభుత్వం కోర్టు ధిక్కరణకు పాల్పడిందని వాదిస్తూ.. హైకోర్టులో పిటిషన్ వేసే అవకాశాలున్నాయన్న ప్రచారం జరుగుతోంది. స్థానిక ఎన్నికల సందర్భంగా.. తెలుగుదేశం పార్టీ అధినేత ప్రత్యేకంగా ఓ కాల్ సెంటర్ ను పార్టీ కార్యాలయంలో ఏర్పాటు చేశారు.
కాల్‌సెంటర్‌కు పెద్ద ఎత్తున వీడియోలను పార్టీ కార్యకర్తలు పంపారు. వాటిని సోషల్ మీడియాలో వైరల్ చేయడంతో మీడియాకు కూడా ఇవ్వడంతో.. ఎక్కడిక్కడ అక్రమాలు పెద్ద ఎత్తున ప్రచారం అయ్యాయని టీడీపీ నమ్ముతోంది. ఇప్పుడు ప్రభుత్వాన్ని పార్టీ కార్యాలయాలకు వేసిన రంగుల ద్వారా ఫిక్స్ చేయాలని టీడీపీ ప్రయత్నిస్తోంది.
