స్థానిక ఎన్నికలు నిలిపివేయాలని తెలుగుదేశం పార్టీ డిమాండ్ చేస్తోంది. దీనికి బీసీ రిజర్వేషన్లతో పాటు … కరోనాను కూడా కారణంగా చూపిస్తోంది. ఈ మేరకు.. టీడీపీ నేతలు.. సీఎం జగన్‌కు బహిరంగలేఖ రాశారు. సుప్రీంకోర్టులో టీడీపీ వేసిన బీసీల రిజర్వేషన్ల పిటిషన్‌లో.. రాష్ట్ర ప్రభుత్వం ఇంప్లీడ్‌ కావాలలని.. లేఖలో ఎంపీ రామ్మోహన్ నాయుడు డిమాండ్ చేశారు. రిజర్వేషన్లలో 10శాతం కోత విధించి బీసీ హక్కులకు భంగం కలిగించారని ఆరోపించారు. రాష్ట్ర ప్రభుత్వం సుప్రీంకోర్టుకు వెళ్లకుండా స్థానిక సంస్థల ఎన్నికల ప్రక్రియను ప్రారంభించడం బీసీల రాజకీయ అవకాశాల్ని అణిచివేయడమేనని మాజీ ఎంపీ కొనకళ్ల నారాయణ మండిపడ్డారు. మరో టీడీపీ బీసీ నేత నిమ్మల కిష్టప్ప మాత్రం ఎన్నికల వాయిదాకు.. కరోనాను కారణంగా చూపిస్తున్నారు.
కరోనా వైరస్‌ కారణంగా ఎన్నికలు వాయిదా వేయాలని.. క్యూలైన్ల ద్వారా కరోనా ప్రమాదం పొంచి ఉందన్నారు. బీసీ రిజర్వేషన్లపై చిత్తశుద్ధి ఉంటే సుప్రీంకోర్టు తీర్పు వచ్చే వరకు..ఎన్నికల ప్రక్రియను నిలిపివేయాలని అంతిమంగా అందరూ డిమాండ్ చేశారు. ఏ పార్టీ అయినా.. ఎన్నికలు వాయిదా వేయాలని డిమాండ్ చేస్తే.. మానసికంగా ఓటమికి సిద్దమయిందని.. విమర్శలు వస్తాయి. ప్రజల్లో కూడా అలాంటి ఫీలింగ్ వస్తుంది. అయినప్పటికీ..బీసీ వాయిస్‌ను గట్టిగా వినిపించాలనుకుంటున్న టీడీపీ.. ఎన్నికల వాయిదాను.. కోరుకుంటోంది. సాధారణంగా స్థానిక సంస్థల ఎన్నికలు రాష్ట్ర ప్రభుత్వానికే అనుకూలంగా వస్తాయి.
ప్రభుత్వ పథకాలు … అధికార యంత్రాంగం సహకారం .. ఇలా అన్నీ కలిసి వస్తాయి. అయితే.. ఓట్లు వేయాల్సింది ప్రజలే. వారి ఆగ్రహం తీవ్ర స్థాయిలో ఉంటే.. ఇవన్నీ ఏమీ చేయలేవు. కానీ..ఎన్నికల సంఘం కూడా చేతుల్లో ఉంటుంది.. పైగా కొత్త ఆర్డినెన్స్ కూడా తీసుకు వచ్చారు. దీంతో టీడీపీ నేతలు.. ఇప్పటికిప్పుడు ఎన్నికలు లేకపోతేనే బాగుంటుందని కోరుకుంటున్నట్లుగా కనిపిస్తోంది.
