తెలంగాణ డీజీపీ అంజనీకుమార్ ను ఏపీకి పంపిస్తామని బండి సంజయ్ .. టెన్త్ పేపర్ లీక్ కేసులో పోలీసులు అరెస్ట్ చేసిన తర్వాత హెచ్చరించారు. తప్పుడు కేసులు పెట్టారని.. ఈ కేసు విషయంలో ఇంతటితో వదిలి పెట్టబోమని హెచ్చరించారు. బండి సంజయ్ అరెస్టుపై కేంద్ర పెద్దలు కూడా అగ్రహించారన్న ప్రచారం జరిగింది. తెర వెనుక ఏం జరిగిందో కానీ.. తెలంగాణ హైకోర్టులో కేంద్రం ఓ పిటిషన్ వేశారు. విచారణ పెండింగ్‌లో ఉన్న సివిల్ సర్వీస్ అధికారుల క్యాడర్ వివాదంపై పిటిషన్ ను త్వరగా పరిష్కరించాలని పిటిషన్‌లో కోరింది. దీంతో ఈ పిటిషన్ పై విచారణను జూన్‌లో చేపడతామని హైకోర్టు తెలిపింది.
తెలంగాణలో విధులు నిర్వహిస్తున్న 12 మంది అధికారుల బదిలీలపై ఉత్కంఠ కొనసాగుతోంది. ఏపీ క్యాడర్‌‌కు చెందిన 12 మంది ఆలిండియా సర్వీస్ ఆఫీసర్లు క్యాట్ మధ్యంతర ఉత్తర్వులతో తెలంగాణలో పని చేస్తున్నారు. వీరిలో తెలంగాణ ఇన్ చార్జ్ డీజీపీ అంజనీకుమార్ ప్రస్తుతం ఈ వివాదం కోర్టులో ఉంది. తెలంగాణ ఇన్ చార్జ్ డీజీపీ అంజనీకుమార్ సహా పలువురు ఐఏఎస్, ఐపీఎస్ అధికారుల కేటాయింపులపై విచారణను తెలంగాణ హైకోర్టు కొన్నాళ్ల కిందట వాయిదా వేసింది. మళ్లీ విచారణకు రాకపోయేసరికి కేంద్రం త్వరగా విచారణ చేయాలని పిటిషన్ దాఖలు చేసింది.
సోమేష్ కుమార్ విషయంలో ఇచ్చిన తీర్పు మెరిట్ ప్రకారం చూస్తే అందరూ ఏపీకి వెళ్లాల్సి వస్తుందన్న అభిప్రాయ అధికారవర్గాల్లో ఉంది. అయితే విచారణను జూన్‌లో చేపడతామని హైకోర్టు చెప్పడంతో మరో రెండు నెలల వరకూ ఈ అంశంలో ఎలాంటి కదలిక ఉండకపోవచ్చు. కానీ ఈ అధికారుల్లో మాత్రం దడ ప్రారంభమవుతుంది. రాజకీయ పరమైన విషయాల్లో బీజేపీకి వ్యతిరేకంగా దూకుడుగా వెళ్తే ఏమైనా జరగవచ్చన్న ఆందోళన వారిలో ఉంటుంది. బీజేపీ ఖచ్చితంగా ఇదే ఎఫెక్ట్ కోరుకుంటుందన్న అభిప్రాయం ఉంది.
