తెలంగాణా ఉద్యమ సమయంలో హైదరాబాద్ లో తెలుగు సినీ పరిశ్రమ ఎన్ని సమస్యలు, అవమానాలు ఎదుర్కొందో అందరికీ తెలుసు. అందుకు కారణం సినీ పరిశ్రమలో చాలా మంది ఆంధ్రాకు చెందినవారే కావడం. ఒకానొక సమయంలో సినీ పరిశ్రమని ఆంధ్రాలో విశాఖపట్నం లేదా మరొక చోటికి తరలిస్తే ఎలాగుంటుంది? అనే ఆలోచన కూడా చేసారు. కానీ అది చాలా భారీ వ్యయప్రయాసలతో కూడిన వ్యవహారం అయినందున, కొన్ని ఇబ్బందులు ఎదురవుతున్నపటికీ హైదరాబాద్ లోనే కొనసాగాలని నిశ్చయించుకొన్నారు.
తెలంగాణా ప్రభుత్వం ఏర్పడిన తరువాత కూడా సినీ పరిశ్రమలో నెలకొని ఉన్న ఆ అభాద్రతాభావాన్ని ఇంకా పెంచిపోషించే విధంగానే వ్యవహరించింది తప్ప వారికి భరోసా కల్పించే ప్రయత్నాలేవీ చేయలేదు. సుమారు ఏడాదిన్నర గడిచిన తరువాత ఆ పరిస్థితిలో కొంత మార్పు వచ్చింది కానీ నేటికీ సినీ పరిశ్రమలో ఇంకా అభద్రతా భావం నెలకొనే ఉంది. కానీ ఎవరూ ఆ విషయం బయటకి చెప్పుకొనే సాహసం చేయకపోయినా సినీ పరిశ్రమలో ప్రముఖులు తరచూ ముఖ్యమంత్రి కేసీఆర్ ని కలుసుకొంటూ ఆయనని ప్రసన్నం చేసుకొనే ప్రయత్నాలు చేయడం గమనిస్తే ఆ సంగతి అర్ధం అవుతుంది.
ఆంద్రప్రదేశ్, తెలంగాణా రాష్ట్రాలు విడిపోగానే తెలుగు సినీ పరిశ్రమ కూడా వెంటనే విడిపోవాలని తెలంగాణాకు చెందిన కొందరు సినీ ప్రముఖులు పట్టుబట్టారు. పట్టుబట్టడమే కాదు అందుకు ఏర్పాట్లు కూడా చేసుకొన్నారు. రాష్ట్రం రెండుగా విడిపోయినప్పటికీ సృజనాత్మక, కళా రంగానికి చెందిన సినీ పరిశ్రమను ఏవిధంగా రెండుగా విభజించవచ్చో ఎవరికీ స్పష్టత లేదు. పైగా రెండూ తెలుగు రాష్ట్రాలే కావడం చేత ఆంధ్రా సినిమా, తెలంగాణా సినిమా అని వేరేగా తీయవచ్చో లేదో వారికే తెలియాలి.
ఒకప్పుడు మద్రాస్ నుండి హైదరాబాద్ కి తెలుగు సినీ పరిశ్రమ తరలివచ్చింది. ఒకవేళ ఆంధ్రా సినీ పరిశ్రమ, తెలంగాణా సినీ పరిశ్రమ అనే వివక్ష చూపకుండా, వారిలో అభద్రతాభావం తొలగించగలిగినట్లయితే నేటికీ హైదరాబాద్ నుండి సినీ పరిశ్రమ ఆంధ్రాకు తరలిరావలసిన అవసరం లేదు. కానీ రాష్ట్ర విభజన తరువాత ప్రత్యేక రాష్ట్రంగా అవతరించిన ఆంద్రప్రదేశ్ లో కూడా సినీ పరిశ్రమ స్థాపించాలనుకోవడం తప్పు కాదు…నేరమూ కాదు. హైదరాబాద్ లో ఎటువంటి ఇబ్బందులు లేకపోతే అక్కడ యధాతధంగా తెలుగు సినీ పరిశ్రమను కొనసాగిస్తూనే అవసరం ఉన్నవాళ్ళు సినీ పరిశ్రమని విశాఖపట్నానికి కూడా వ్యాపింపజేయవచ్చును.
ఆంద్రప్రదేశ్ ముఖ్యమంత్రి చంద్రబాబు నాయుడు నిన్న విశాఖలో ఫిలిం కల్చరల్ సెంటర్ భవనానికి శంఖుస్థాపన చేసినప్పుడు మాట్లాడుతూ తెలుగు సినీ పరిశ్రమ విశాఖ తరలి రావాలని కోరారు. ఆవిధంగా కోరడం తెలంగాణా సినిమాటోగ్రఫి మంత్రి తలసాని శ్రీనివాస యాదవ్ కి తప్పుగా అనిపించింది. చంద్రబాబు నాయుడు బాలకృష్ణ, జూ.ఎన్టీఆర్, పవన్ కళ్యాణ్ వంటి సినిమావాళ్ళను అడ్డం పెట్టుకొని రాజకీయాలు చేసారని, వాళ్ళని విశాఖకు తరలిరావాలని కోరడం చాలా హాస్యాస్పదంగా ఉందని అన్నారు. సినీ పరిశ్రమకి చెందినవారు చాలా మంది తెరాసలో కూడా ఉన్నారు. ఎన్నికల సమయంలో తెరాస వారిని కూడా వాడుకొంటుంది. ఒకప్పుడు సినీ పరిశ్రమలో ఒక వెలుగు వెలిగిన విజయశాంతి తెరాస నుండి ఎందుకు బయటకు వెళ్ళవలసి వచ్చిందో అందరికీ తెలుసు.
తెలుగు సినీ పరిశ్రమని కేవలం ఆంధ్రాకి చెందిన పరిశ్రమగానే చూసి, ఉద్యమ సమయంలో వారిని భయబ్రాంతులను చేసిన సంగతి తలసాని మరిచిపోవచ్చును కానీ సినీ పరిశ్రమ ఎన్నటికీ మరచిపోదు. ఇంతకాలం సినీ పరిశ్రమని ఆంధ్రా సినీ పరిశ్రమగా మాత్రమే చూసిన తెరాస ప్రభుత్వానికి అది రాష్ట్రానికి బంగారు బాతు వంటిదని ఇప్పుడు గుర్తించినట్లు తలసాని మాటలతో అర్ధం అవుతోంది. అందుకే దానిని విశాఖ తరలిరమ్మని చంద్రబాబు నాయుడు పిలిస్తే ఆవిధంగా స్పందించారని భావించవలసి ఉంటుంది. కానీ ఆంద్రప్రదేశ్ రాష్ట్రంలో కూడా సినీ పరిశ్రమ ఏర్పడవలసిన అవసరం ఉందనే సత్యాన్ని తలసాని కూడా కాదనలేరు. ఆంద్రప్రదేశ్ రాష్ట్రానికి తెలుగు సినీ పరిశ్రమ తరలిపోకూడదనుకొంటే, అది హైదరాబాద్ లోనే నిశ్చింతగా తన కార్యక్రమాలు చేసుకొనేందుకు తెరాస ప్రభుత్వం దానికి అవసరమయిన సహకారం అందిస్తే చాలు.
