సుశాంత్ సింగ్ రాజ్ పుత్ ఆత్మ‌హ‌త్య తో ఒక్క‌సారిగా తెలుగు ప్రేక్ష‌కుల‌కు ఉద‌య్ కిర‌ణ్ గుర్తొచ్చాడ ఇద్ద‌రి నేప‌థ్యాలు వేరైనా… ఇంచుమించు ఒకేలా కెరీర్ మొద‌లెట్టి, ఒకేలా త‌నువు చాలించారు. ఉద‌య్ – సుశాంత్ జీవితాల్ని ఒక్క‌సారిగా పోల్చుకుని చూసుకుని.. మ‌రింత‌గా ఉద‌య్ కిర‌ణ్ జ్ఞాప‌కాల్లోకి వెళ్లిపోయారు. ఓవైపు బాలీవుడ్ లో సుశాంత్ సింగ్ బయోపిక్ గురించి చ‌ర్చ మొద‌లైతే – టాలీవుడ్ లోనూ ఉద‌య్ కిర‌ణ్‌పై సినిమా తీయ‌డానికి ప్ర‌య‌త్నాలు ముమ్మ‌రం అయ్యాయి.
ఇది వ‌ర‌కే ఉద‌య్ కిర‌ణ్ బయోపిక్ వ‌స్తుంద‌ని గ‌ట్టిగా ప్ర‌చారం జ‌రిగింది. దానికి తేజ ద‌ర్శ‌క‌త్వం వ‌హిస్తార‌ని చెప్పుకున్నారు. అయితే తేజ ఆ వార్త‌ల్ని ఖండించారు. ఇప్పుడు మరో ద‌ర్శ‌కుడు ఈ బాధ్య‌త‌ని భుజాన వేసుకున్న‌ట్టు తెలుస్తోంది. ఆ ద‌ర్శ‌కుడికీ- ఉద‌య్‌కి మంచి అనుబంధం ఉంది. ఇద్ద‌రి కాంబినేష‌న్‌లో రెండు సినిమాలొస్తే.. అందులో ఒకటి బ్లాక్ బ్ల‌స్ట‌ర్‌. అందుకే ఇప్పుడు ఆ ద‌ర్శ‌కుడు ఉద‌య్ కిర‌ణ్ స్క్రిప్టు ప‌నుల్లో త‌ల‌మున‌క‌లై ఉన్నాడ‌ని తెలుస్తోంది. అన్న‌ట్టు… ఈ రోజు ఉద‌య్ కిర‌ణ్ జ‌యంతి. త్వ‌ర‌లోనే ఉద‌య్ కిర‌ణ్ బయోపిక్ కి సంబంధించి అధికారికంగా ఓ వార్త బ‌య‌ట‌కు వ‌చ్చే అవ‌కాశం ఉంది.
