అమెరికా తమ దేశ పౌరులకు కొన్ని అడ్వయిజరీలు జారీ చేస్తూ ఉంటుంది. ఫలానా దేశానికి వెళ్లవద్దని.. వెళ్లినా ఫలానా ప్రాంతాలకు వెళ్లవద్దని సలహాలిస్తూ ఉంటారు. ఎందుకంటే అక్కడ పరిస్థితి బాగుండదని.. శాంతిభద్రతలు ఘోరంగా ఉంటాయని చెబుతూ ఉంటారు. ఇప్పుడు ఇతర ప్రపంచదేశాలు అమెరికా గురించి ఇలా అడ్వయిజరీలు జారీ చేయాల్సిన పరిస్థితి కనిపిస్తోంది.

హై సెక్యూరిటీ కాస్తా లో సెక్యూరిటీ రేటింగ్

అమెరికా అంటే అత్యున్నత భద్రతకు మారుపేరు అనే పాత నమ్మకం ఇప్పుడు మసకబారుతోంది. ప్రపంచంలోనే అత్యంత శక్తివంతమైన దేశంగా పేరుగాంచిన అమెరికాలో, సాక్షాత్తూ దేశాధ్యక్షులకే రక్షణ లేని పరిస్థితి ఏర్పడటం ఆ దేశ భద్రతా వ్యవస్థలో గూడుకట్టుకున్న వైఫల్యాలను ఎత్తిచూపుతోంది. గతంలో పెన్సిల్వేనియా ఎన్నికల ప్రచార సభలో డొనాల్డ్ ట్రంప్‌పై జరిగిన హత్యాయత్నం సెకను కంటే తక్కువ వ్యవధిలో ఆయన తల తిప్పడం వల్ల ప్రాణాపాయం తప్పింది. ఇప్పుడు ఏకంగా ఆయన ఇస్తున్న కరస్పాండెంట్స్ పార్టీ వద్దనే కాల్పులు చోటు చేసుకున్నాయి. ఆ దేశం హై సెక్యూరిటీ నుంచి లో సెక్యూరిటీ జోన్‌లోకి వెళ్ళిపోయిన భావన అందరిలో ఏర్పడుతోంది.

ట్రంప్ పెంచిన విద్వేషమే పెద్ద సమస్య

అమెరికా ఇప్పుడు గతంలో ఎన్నడూ లేనంతగా రాజకీయంగా రెండు చీలికలైపోయింది. డెమోక్రాట్లు , రిపబ్లికన్ల మధ్య విద్వేషం ఎంతలా పెరిగిందంటే, ఎదుటి పక్షం నాయకుడిని తమ దేశానికి శత్రువుగా చూసే స్థాయికి చేరుకుంది. రాజకీయ చర్చలు కాస్తా వ్యక్తిగత దూషణలుగా, హింసాత్మక ప్రేరేపణలుగా మారుతున్నాయి. సోషల్ మీడియాలో సాగే ద్వేషపూరిత ప్రసంగాలు మానసికంగా అస్థిరంగా ఉన్న వ్యక్తులను ప్రభావితం చేసి, నేరుగా నాయకులపైనే దాడులకు పురికొల్పుతున్నాయి. ఈ రాజకీయ తీవ్రవాదం ఇప్పుడు అమెరికా అంతర్గత భద్రతకు అతిపెద్ద సవాలుగా మారింది.

సీక్రెట్ సర్వీస్ వైఫల్యాలు

అమెరికా అధ్యక్షులకు రక్షణ కల్పించే సీక్రెట్ సర్వీస్ పనితీరుపై ఇప్పుడు పెద్ద ఎత్తున విమర్శలు వస్తున్నాయి. నిధుల కొరత, సిబ్బంది కొరతతో పాటు సాంకేతిక పరిజ్ఞానాన్ని వాడటంలో జాప్యం జరుగుతోందన్న విమర్శలు ఉన్నాయి. డ్రోన్ టెక్నాలజీని వాడటంలో దొర్లిన తప్పుల వల్ల పెన్సిల్వేనియా ఘటనలో నిందితుడు అంత ఎత్తు బిల్డింగ్ మీదకు ఎక్కగలిగాడు. ప్రపంచవ్యాప్తంగా ఇతర దేశాల నేతలకు భద్రతా సూచనలు చేసే అమెరికా, తన సొంత గడ్డపై ఒక అభ్యర్థికి 360 డిగ్రీల రక్షణ కల్పించలేకపోవడం ఆ సంస్థ ప్రతిష్టను మసకబార్చింది.

కట్టడి లేని మారణాయుధాలు

అమెరికాలో భద్రత క్షీణించడానికి మరో ప్రధాన కారణం అక్కడి గన్ కల్చర్. అమెరికా రాజ్యాంగంలోని రెండవ సవరణ పౌరులకు ఆయుధాలు కలిగి ఉండే హక్కును కల్పిస్తోంది. ఫెడరల్ బ్యూరో ఆఫ్ ఇన్వెస్టిగేషన్ గణాంకాల ప్రకారం, అమెరికాలో జనాభా కంటే ఆయుధాల సంఖ్యే ఎక్కువగా ఉంది. సులభంగా లభించే సెమీ-ఆటోమేటిక్ రైఫిళ్లు సామాన్యుల చేతుల్లోకి వెళ్లడం వల్ల, నిఘా వర్గాలు ప్రతి వ్యక్తిని ట్రాక్ చేయడం అసాధ్యంగా మారింది. సెక్యూరిటీ సర్వీస్ ఎంత పటిష్టంగా ఉన్నా, ఇతరులకు తెలియకుండా పథకం వేసే లోన్ వుల్ఫ్ అటాకర్లను గుర్తించడంలో వైఫల్యం చెందుతోంది. తుపాకీ నియంత్రణ చట్టాలను పటిష్టం చేయకపోవడం, రాజకీయ విభేదాలను హింసగా మార్చుకోవడం వల్ల ఒకప్పుడు సురక్షితమైన దేశం అనుకున్న అమెరికా ఇప్పుడు తన సొంత అధ్యక్షుడినే కాపాడుకోలేక తడబడుతోంది. భవిష్యత్తులో ఈ పరిస్థితి మారాలంటే కేవలం భద్రతా వలయాలు పెంచడం మాత్రమే కాదు, సమాజంలో వేళ్లూనుకున్న విద్వేషాన్ని తగ్గించడం కూడా అంతే ముఖ్యమని అర్థం చేసుకోవచ్చు.