వెబ్ సిరీస్‌ల హ‌వా న‌డుస్తోంది. యువ ద‌ర్శ‌కుల‌కు వెబ్ సిరీస్… ఓ వేదిక అయ్యింది. స్టార్ ద‌ర్శ‌కులూ… ఓటీటీ బాట ప‌డుతున్నారు. ఇప్పుడు వెట‌ర‌న్ ద‌ర్శకుల‌కూ… ఓటీటీ `వెల్ క‌మ్` చెబుతోంది. తాజాగా సీరియ‌ర్ ద‌ర్శ‌కుడు వంశీ కూడా ఓటీటీ కోసం ఓ వెబ్ సిరీస్ రూపొందిస్తున్నారు. అయితే.. ఇది ఓ డాక్యుమెంట‌రీ త‌ర‌హా లో సాగుతుంది.
వంశీకి గోదావ‌రి అంటే చాలా ఇష్టం. ఆయన సినిమాల‌న్నీ గోదావ‌రి నేప‌థ్యంలో సాగేవే. ఇప్పుడు ఈ వెబ్ సిరీస్ కూడా అందుకోస‌మే. గోదావ‌రి పరివాహక ప్రాంతాలూ, అక్క‌డి ప్ర‌జ‌ల అభిరుచులు, అక్క‌డి చ‌రిత్ర, ఆ పరివాహక ప్రాంతాల నుంచి వ‌చ్చిన సెల‌బ్రెటీలూ, అక్క‌డి రుచులూ.. ఇలా గోదావ‌రి గురించిన స‌మ‌స్త స‌మాచారాన్నీ క్రోడీక‌రించి ఈ వెబ్ సిరీస్ రూపొందిస్తున్నారు. నిజానికి ఇది చాలా పెద్ద ప్ర‌య‌త్నం. నెట్ ఫ్లిక్స్ లాంటి ఓటీటీ వేదిక‌లు ఇలాంటి డాక్యుమెంట‌రీల‌కు ఎక్కువ ప్రాధాన్యం ఇస్తుంటాయి. మ‌రి ఈ వెబ్ సిరీస్ ఎవ‌రి కోస‌మో తెలియాలంటే ఇంకొంత కాలం ఆగాలి.
