నాని దసరా సినిమా వందకోట్ల క్లబ్బులో చేరిందని టీం ప్రకటించింది. నానికి గతంలో చాలా విజయాలు వున్నాయి. కానీ ఇదే తొలి వందకోట్ల సినిమా. ఆ రకంగా దసరా నానికి చాలా ప్రత్యేకం. దసరాని పాన్ ఇండియా సినిమాగా విడుదల చేశారు. హిందీ లో ఓ మోస్తారుగా ఆడింది. యూస్ మాత్రం మంచి నెంబర్స్ చేసింది.
అయితే దసరా సినిమాకి మీడియా నుంచి రావాల్సినంత సపోర్ట్ రాలేదనేది నాని అభిప్రాయం. కరీంనగర్ లో జరిగిన ఈవెంట్ లో నాని మాటలు వింటే .. దసరాపై మీడియా నెగిటివ్ ప్రచారం చేసిందని ఆయన నేరుగా చెప్పారు. ”నేను నాకు తోచింది మనసుకు నచ్చింది చేస్తూ వచ్చాను. ఈ క్రమంలో నిరాశ పరిచిన వారూ వున్నారు. మనం ముందుకు వెళ్తామంటే వెనక్కి లాగేవారే ఎక్కువ. కానీ బలంగా నమ్మి మనస్పూర్తిగా దిగుతాను. మీడియా, సోషల్ మీడియాలో ఒక కొత్త సినిమా రిలీజ్ అయితే పోవాలని కోరుకునే వారే ఎక్కువ. వాళ్ళందరిది తప్పు అని నిరూపించాలి. ఈ నెగిటివిటీ అనే చెడు మీద మంచి గెలవాలి. ఈ రోజు ‘దసరా’ అనే మంచి గెలిచింది” అని చెప్పుకొచ్చారు నాని.
దసరాలో నాని నటన బావుందని అందరూ మెచ్చుకున్నారు. దాదాపు అన్నీ రివ్యూలలో అదే రిపోర్ట్ వచ్చింది. కానీ సినిమాకి డివైడ్ టాక్ వచ్చింది. గతంలో వచ్చిన చాలా సినిమాలతో పోలిక పెడుతూ అసలు దసరాలో ఒరిజినాలిటీ లేదని అభిప్రాయాన్ని వ్యక్తం చేశారు చాలా మంది. అయితే అవన్నీ దాటుకొని దసరా వందకోట్లు సాధించడంతో నాని తన అభిప్రాయాన్ని ఎలాంటి దాపరికం లేకుండా బయటపెట్టాడు.
