‘నేను శైలజ’ సినిమాతో తెలుగు సినీ పరిశ్రమలోకి ప్రవేశించిన మలయాళీ భామ కీర్తి సురేష్ బంపర్ ఆఫర్ కొట్టేసింది. ఆమెకు రెండవ సినిమాతోనే మెగా పవర్ స్టార్ రామ్ చరణ్ తో జత కట్టేందుకు అవకాశం దక్కింది. అయితే అందుకు ఆమె ప్రతిభ ఒకటే కారణం కాదు. ఆమెకు అదృష్టం కూడా ఉండబట్టి అన్నీ కలిసివచ్చి ఆమెకు ఆ అవకాశం దక్కింది.
తమిళంలో సూపర్ హిట్ అయిన ‘తన్ని ఒరువన్’ సినిమాని తెలుగులో రామ్ చరణ్ తేజ్ తో రీమేక్ చేస్తున్నారు. నిర్మాతలు దాని బడ్జెట్, షూటింగ్ షెడ్యూల్ విషయంలో ముందే కొన్ని పరిమితులు విదించుకొన్నారు. ఈ సినిమాకి మొదట శ్రుతీ హాసన్ న్ని హీరోయిన్ గా అనుకొన్నారు. కానీ ఆమె డేట్స్, పారితోషికం రెండూ కూడా వారికి అందుబాటులో లేకపోవడంతో కొత్తగా ఇండస్ట్రీలోకి వచ్చిన కీర్తి సురేష్ వారి దృష్టిని ఆకర్షించింది.
ఆమె తన మొట్టమొదటి సినిమాతోనే తన నటన, అందంతో అందరినీ ఆకట్టుకొంది. పైగా ఆమె చేతిలో వేరే మరే సినిమాలు కూడా లేవు కనుక ఏకబిగిన సాగే ఈ సినిమా షూటింగ్ పూర్తయ్యే వరకు సినిమా చేయడానికి ఇబ్బంది ఉండదు. కొత్త హీరోయిన్ కనుక పారితోషికం కూడా పెద్దగా ఉండదు. కనుక ఆమెనే ఈ సినిమాకి హీరోయిన్ గా ఎంచుకొన్నారు. త్వరలోనే ఆమెకు స్క్రీన్ టెస్ట్ చేస్తారు. అందులో కూడా ఒకే అయిపోతే ఇక రామ్ చరణ్ తేజ్ పక్కన హీరోయిన్ గా చాన్స్ కొట్టేసినట్లే!
