నందమూరి బాలకృష్ణ 99వ సినిమా ‘డిక్టేటర్‌’ మాస్‌ ఆడియన్స్‌ని బాగా ఎంటర్‌టైన్‌ చేస్తూ కలెక్షన్లు సాధిస్తున్న విషయం తెలిసిందే. ‘లయన్‌’ నందమూరి అభిమానుల్ని డిజప్పాయింట్‌ చేసినా ‘డిక్టేటర్‌’ అభిమానులతోపాటు బాలకృష్ణకు కూడా కొత్త ఉత్సాహాన్నిచ్చింది. ఇప్పుడు తన 100వ సినిమా ఎలా వుండాలి, ఎవరితో చెయ్యాలి అనే విషయంలో బాలకృష్ణ ఒక నిర్ణయానికి రాలేకపోతున్నాడు. నిన్న మొన్నటి వరకు చిరంజీవి తన 150వ సినిమా ఏ డైరెక్టర్‌తో చెయ్యాలి, కథ ఎలా వుండాలి అనే విషయాల్లో చాలా కన్‌ఫ్యూజ్‌ అవ్వడమే కాకుండా ఇప్పటికి వరకూ ఏదీ తేల్చలేదు. ఇప్పుడు బాలకృష్ణ వంతు వచ్చింది. చిరంజీవిలాగే ఎటూ తేల్చుకోలేక సతమతమవుతున్నాడు బాలయ్య. తనకు సింహా, లెజెండ్‌ వంటి బ్లాక్‌బస్టర్స్‌ ఇచ్చిన బోయపాటి శ్రీనుతోనే 100వ సినిమా చేస్తానని మొన్నటి వరకు చెప్పిన బాలయ్య ‘ఆదిత్య 369’కి సీక్వెల్‌గా సింగీతం శ్రీనివాసరావుతో ‘ఆదిత్య 999’ చేసే ఆలోచనలో వున్నట్టు తెలిసింది.
100వ సినిమా అత్యంత ప్రతిష్ఠాత్మక చిత్రంగా భావించిన బాలకృష్ణ ఈ సినిమాని కొత్త డైరెక్టర్‌తో చేస్తే ఎలా వుంటుంది అనే విషయాన్ని కూడా పరిశీలిస్తున్నాడట. పరుచూరి వెంకటేశ్వరరావు తనయుడు పరుచూరి రవీంద్ర తన ఫస్ట్‌ మూవీ బాలకృష్ణతో చెయ్యాలని ఉవ్విళ్ళూరుతున్నాడట. ఇప్పటికే రవీంద్ర ఒక జానపద కథను బాలకృష్ణకు వినిపించాడు. భారీ బడ్జెట్‌తో, భారీ గ్రాఫిక్స్‌తో ఈ చిత్రాన్ని నిర్మించాల్సి వుంటుంది. మరి 100వ సినిమాని జానపద సినిమాగా బాలయ్య చేస్తాడా? లేదా? అనేది తెలియాల్సి వుంది. బాలకృష్ణ ఏం చెబుతాడా? అని రవీంద్ర ఎదురుచూస్తున్నాడు. మరి బాలకృష్ణ 100వ సినిమా ఎవరి డైరెక్షన్‌లో వుంటుందో తెలియాలంటే కొంతకాలం ఆగాల్సిందే.
