టాలీవుడ్లో ఒకప్పుడు రచయితగా..ఇప్పుడు నటుడుగా నిలబడిన.. పోసాని కృష్ణమురళి.. వైఎస్ఆర్ కాంగ్రెస్ పార్టీకి ముందూ వెనుకా చూడకుండా సపోర్ట్ చేస్తున్నారు. గతంలో ప్రజారాజ్యం పార్టీ తరపున చిలుకలూరిపేటలో పోటీ చేసి… డిపాజిట్ కూడా తెచ్చుకోలేకపోయిన పోసాని.. ఆ తరవాత రాజకీయాల నుంచి విరమించుకున్నారు. తాను ఇక ఏ పార్టీలోనూ చేరబోనని చెప్పారు. చేరలేదు కూడా. కానీ ఇప్పుడు వైసీపీకి మాత్రం… పూర్తి స్థాయిలో మద్దతిస్తున్నారు. అభిమానం ఉంటే.. మద్దతిచ్చే పార్టీని పొగుడుకోవచ్చు కానీ.. పోసాని మాత్రం చంద్రబాబును వ్యక్తిగతంగా తిడుతూ… జగన్కు ఆనందం కలిగించేందుకు ప్రయత్నిస్తున్నారు. గతంలో అదే చేశారు.ఇవాళ కూడా అదే చేశారు. కొద్ది రోజుల క్రితం.. ప్రత్యేకంగా వెళ్లి పాదయాత్రలో ఉన్న వైఎస్ జగన్ తో సమావేశమై… ఆయన కోసం వకాల్తా పుచ్చుకున్నట్లు మాట్లాడారు. జగన్ను ముఖ్యమంత్రిని చేసి.. ఆ తర్వాత ఆయన సరిగ్గా పని చేయకపతే.. తన ఇంటికి వచ్చి చెప్పుతో కొట్టాలని ఆఫర్ కూడా ఇచ్చారు.
ఇప్పుడు మళ్లీ జగన్ కోసం బ్యాటింగ్ ప్రారంభించారు. జగన్ మీడియా సహకారంతో ప్రత్యేకంగా ప్రెస్మీట్ పెట్టిన పోసాని.. కృష్ణమురళి.. చంద్రబాబుపై వ్యక్తిగతమైన విమర్శలు చేశారు. ఓటుకు నోటు కేసులో అడ్డంగా దొరికిపోయి కేసీఆర్ కాళ్లు పట్టుకుని అమరావతి పారిపోయారని నోరు చేసుకున్నారు. రాజకీయ అవసరం కోసం ఎవరి కాళ్లు అయినా పట్టుకునే చంద్రబాబు వగలాడి అని పోసాని మండిపడ్డారు. దేశంలోని ఏ ముఖ్యమంత్రి తెచ్చుకోనన్ని స్టేలను చంద్రబాబు తెచ్చుకున్నారని సాక్షి పేపర్లో రాసే మాటలను చెప్పుకొచ్చారు. అదే సమయంలో జగన్ పై వచ్చిన ఆరోపణలు మాత్రం ఖండించేశారు. జగన్ అసలు అవినీతే చేయలేదని సర్టిఫికెట్ ఇచ్చేశారు. అనుభవం లేదన్న విమర్శలకూ .. ఆయనే కౌంటర్ ఇచ్చేశారు. ఆయనకు అనుభవం అక్కర్లేదని సర్టిఫికెట్ జారీ చేశారు.
పోసాని కృష్ణమురళి కొన్నాళ్లుగా ఇదే విధంగా వ్యవహరిస్తున్నారు. ఆయనకు రాజకీయ ఆకాంక్షలు ఉంటే ఆ పార్టీలో నేరుగా చేరిపోయి విమర్శలు చేయవచ్చు. కానీ ఆయన పార్టీలో చేరలేదని చెప్పుకుంటూ చంద్రబాబుపై వ్యక్తిగతంగా విరుచుకుపడుతున్నారు. పోసాని డొంక తిరుగుడు రాజకీయాలెందుకో ఎవరికీ అర్థం కావడం లేదు. నేరుగా ఆ పార్టీలో చేరి మాట్లాడితే.. అధికార ప్రతినిధి ఏమో అనుకుంటారు. కానీ ఆ పార్టీలో లేను అంటూ… ఇలా అడ్డగోలుగా.. జగన్ పై అభిమానం చూపిస్తూ.. చంద్రబాబును తిట్టుకుంటూ ఉంటే… అద్దె మైక్ అనే అనుకుంటారు. ప్రస్తుతానికి పోసాని స్టేటస్ ఇదే అనుకుంటున్నారు.. అటీ రాజకీయ..ఇటు సినీ జనాలు కూడా..!
