పైర‌సీ పెనుభూతంలా మారుతోంది. రోజు రోజుకీ త‌న విశ్వ‌రూపం చూపిస్తూనే ఉంది. పైర‌సీ కార‌ణంగా… చిత్ర‌సీమ యేటా కొన్ని వంద‌ల కోట్లు న‌ష్ట‌పోతోంది.ఈమ‌ధ్య విడుద‌లైన ‘స‌ర్కార్‌’, ‘థ‌గ్స్ ఆఫ్ హిందూస్థాన్‌’ చిత్రాలు విడుద‌ల రోజునే పైర‌సీ బారీన ప‌డ్డాయి. ఈ రెండు సినిమాల్నీ ముందే ఆన్‌లైన్‌లో పెట్టేసిన త‌మిళ రాకర్స్ అనే వెబ్‌సైట్ ఇప్పుడు `రోబో 2.ఓ`నీ పైర‌సీ చేస్తామంటూ సంకేతాలు పంపేసింది. ఈ విష‌యాన్ని ట్విట్ట‌ర్‌ని వేదిక చేసుకుని ప్ర‌క‌టించ‌డం గ‌మ‌నార్హం. `త్వ‌ర‌లోనే రోబో 2.ఓని విడుద‌ల చేస్తున్నాం` అంటూ త‌మిళ రాక్స్ చేసిన ట్వీట్ ఇప్పుడు దేశ‌వ్యాప్తంగా సంచ‌ల‌నం సృష్టిస్తోంది. దాదాపు 600 కోట్ల‌తో రూపొందిన చిత్రం ‘రోబో 2.ఓ’. ఈనెల 29న విడుద‌ల అవుతోంది. ఈ సినిమా కోసం ప్ర‌పంచ‌వ్యాప్తంగా ర‌జ‌నీ అభిమానులు ఎంతో ఆస‌క్తితో ఎదురుచూస్తున్నారు. ఇలాంటి త‌రుణంలో.. లీక్ చేస్తామంటూ వచ్చిన హెచ్చ‌రిక చిత్ర‌బృందాన్ని ఆందోళ‌న‌కు గురి చేస్తోంది. ఎలాగైనా స‌రే.. ఈ సినిమాని లీకేజీ వీరుల బారీన ప‌డ‌కుండా కాపాడాల‌ని చిత్ర‌బృందం శ‌క్తివంచ‌న లేకుండా కృషి చేస్తోంది. ఇందుకోసం ర‌జ‌నీ అభిమానుల స‌హాయాన్ని కోరుతోంది. ”ఇలా సినిమా విడుద‌ల‌కు ముందే లీక్ చేస్తామ‌ని బెదిరించం వ‌ల్ల.. చిత్ర‌సీమ ఎంత ఇబ్బందిలో ఉందో అర్థం అవుతోంది. కోట్ల రూపాయ‌ల పెట్టుబ‌డితో తీసిన సినిమాలు లీకేజీల బారీన ప‌డ‌డం శ్రేయ‌స్క‌రం కాదు. దీన్ని ప‌రిశ్ర‌మ అడ్డుకోవాలి” అంటూ.. త‌మిళ చ‌ల‌న చిత్ర ప్ర‌ముఖులు ఆందోళ‌న వ్య‌క్తం చేస్తున్నారు.
పైర‌సీ ప్ర‌మాదంలో ‘రోబో 2.ఓ’
